Afg‘onistonda xavfsizlik sohasidagi vaziyat xavotir uyg‘otadi, dedi Pentagon (AQSh Mudofaa vazirligi) matbuot kotibi Jon Kirbi. Uning so‘zlariga ko‘ra, “Tolibon” harakati mamlakatda hujum sur’atlarini oshirmoqda, ammo Afg‘oniston hukumatida vaziyatni qo‘lga olish imkoniyati bor.
Brifing chog‘ida Kirbi Afg‘onistondagi vaziyat yomonlashayotgani, o‘tgan uch kun ichida “Tolibon” beshta viloyat ma’muriy markazlarini egallab olganini ta’kidladi. Uning aytishicha, jangarilar hujumlarni kuchaytirgan. “Bu chuqur xavotir uyg‘otadi”, — deb hisoblaydi matbuot kotibi.
Jon Kirbi qayd etishicha, AQSh afg‘on hukumati kuchlarida “jangovar vaziyatni ahamiyatli darajada o‘zgartirish imkoniyati bor” deb hisoblaydi. Uning qo‘shimcha qilishicha, Vashington Kobulga ko‘mak ko‘rsatishda, xususan, jangarilar pozitsiyalariga aviazarbalar berishda davom etadi.
“Tolibon”ning Afg‘onistondagi hujumlari shunchalik kuchli sur’atlarda bormoqdaki, AQSh jangarilarga qarshi o‘z aviatsiyasining ancha kuchliroq vositalarini jalb qilishiga to‘g‘ri kelmoqda.
Xususan, AQSh afg‘on qo‘shinlariga yordam berish maqsadida B-52 strategik bombardimonchilarini va quruqlikdagi kuchlarni qo‘llab-quvvatlovchi AC-130 samolyotlarini yuborgan.
Afg‘onistondan AQSh kontingentini olib chiqish boshlangach mamlakatdagi vaziyat keskinlashdi. 22-iyul kuni Tolibon Afg‘oniston chegaralarining 90 foizini nazorat qilayotganini aytdi, rasmiylar buni inkor etmoqda. AQSh “Tolibon”ning pozitsiyalari kuchayganiga qaramay, Afg‘onistondan qo‘shinlarni olib chiqish rejalarini o‘zgartirmasligini ma’lum qildi.
Izoh (0)