Portugaliyada istiqomat qilgan keksa er-xotin va ularning kenja o‘g‘li vaksina olishdan bosh tortganidan keyin COVID-19 oqibatida vafot etdi. Bu haqda The Guardian nashriga vafot etgan oilaning to‘ng‘ich o‘g‘li Fransis Gonsalves ma’lum qildi, deb yozadi “RBK”.
Gonsalvesning fikricha, uning onasi Sharman va ukasi Shaul koronavirusni oilaviy tushlik chog‘ida yuqtirib olgan, kasallik manbasi uning 73 yoshli otasi Bezil bo‘lgan. U bungacha kasalxonada yotib, koronavirusdan davolangan. Oila COVID-19’ga qarshi emlanmagan. “Ular vaksinaga qarshi kurashuvchilar targ‘ibotlari ta’siriga tushib qolgan edi”, — dedi Gonsalves.
Oilaviy tushlikdan keyin 40 yoshli Shaul va uning otasining ahvoli yomonlashgan. Doim tetik bo‘lib, sog‘lom turmush tarzini olib borgan va faqat o‘simlik mahsulotlari bilan oziqlangan Shaul akasiga “o‘zini go‘yoki vazn yig‘ib, charchagandek his qilayotganini” aytgan. Uning ota-onasida esa salomatlik bilan bog‘liq jiddiy muammolar bo‘lgan.
Frensis Gonsalvesning o‘zi Uels poytaxti Kardiffda yashaydi va bosh oshpaz bo‘lib ishlaydi. U Portugaliyaga yetib borganida onasi sun’iy koma holatida yotgan, ukasi va otasi esa allaqachon vafot etgan. Gonsalveslarning uchalasi ham Lissabondagi qabristonga dafn etilgan.
Avvalroq AQShning Kaliforniya shtatida COVID-19 pandemiyasi davrida odamlarning emlanishiga qarshi kurashgan 34 yoshli bloger Stiven Garmon koronavirusdan vafot etgan edi.
Izoh (0)