Дунёнинг турли қитъаларида — Америка, Европа, Африка ва Осиёда давом этаётган ўрмон ёнғинлари аллақачон ўн минглаб гектар майдонларни вайрон қилди. Бир қатор мамлакатларда 2021 йилда содир бўлган ёнғинлар сони ўтган йиллардаги ўртача кўрсаткичдан ошиб кетди.
NASA агентлигининг ФИРМС тизими сунъий йўлдош харитасига кўра, ёнғинлар дунёнинг кўп жойларида — Шимолий ва Жанубий Американинг катта қисмида, Африка платосида ва Арабистон ярим оролининг шимолида, Европада, хусусан, Ўрта Ер денгизи соҳилида, қитъанинг шимолий ва шарқий қисмларида қайд этилган.
Ўрмон ёнғинлари Ҳиндистон соҳиллари, Россиянинг Сибир ҳудуди, Хитой, Малайзия, Индонезия, Океания ва Австралиянинг шарқига ҳам таъсир кўрсатди.
Греция
Грецияда 10 кундан буён давом этаётган ўрмон ёнғинларининг аксарияти кўплаб уринишларга қарамай назоратга олинмади. Ҳукумат ҳаммаси бўлиб яна 55 та ёнғин ўчоғини ўчиришга ҳаракат қилмоқда.
Афина миллий расадхонаси (EАА) Европа космик агентлигининг Sentinel 2 миссияси сунъий йўлдош маълумотларига таяниб хабар беришича, Грециядаги ўрмон ёнғинлари минглаб гектар ер майдонларини вайрон қилган. EАА ўрмонли ҳудудларда ёнғинларнинг янада кенгайиши мумкинлигидан огоҳлантирди.
Эгрибоз ороли маҳаллий ҳукуматининг маълум қилишича, оролда етти кундан буён ўрмон ёнғинлари давом этмоқда ва минглаб гектар ҳудудлар бутунлай вайрон бўлган, камида 1000 та уй ёниб кетган.
Мавзуга доир: Грецияда йирик ўрмон ёнғинлари содир бўлмоқда. Юзлаб уйлар вайрон бўлди (фото ва видео)
Россияда ҳам йирик ўрмон ёнғинлари давом этмоқда. Мамлакатда ҳали 155 та ёнғин ўчоғини бартараф этиш имкони бўлмади. Сибирнинг иккита қишлоғидаги аҳоли тўлиқ эвакуация қилинди. Маҳаллий ҳукуматнинг хабар беришича, ёнғинларни ўчиришга 3600 ўт ўчирувчи жалб қилинган.
Ёқутистонда ҳам июль ойи бошида содир бўлган ўрмон ёнғинларини ўчириш ишлари ҳалигача давом этмоқда.
Ёқутистон президенти Айсен Николаев қулаган дарахтлар кўринишидаги тўсиқларни олиб ташлаш орқали ўт ўчирувчиларнинг ўрмон ёнғинлари зонасига киришини енгиллаштиришни буюрди.
Россия Федерацияси Ўрмон хўжалиги федерал агентлигининг маълум қилишича, 9 август ҳолатига кўра, 1 миллиард 793 миллион гектар майдонда ўрмон ёнғинларини ўчириш ишлари давом этмоқда. Агентлик ёнғинни ўчиришга 7 мингга яқин ўт ўчирувчилар ва юзлаб техникалар жалб қилинганини қайд этди. Ўтган ҳафта давомида ҳаммаси бўлиб 372 та ёнғин ўчоғи ўчирилди.
АҚШ
АҚШда ўрмон ёнғинларининг фаол ўчоқлари сони 107 тага етди. Тахминан, 920 минг гектар ўрмон майдонлари ёнғиндан зарарланди. Калифорнияда кучли ўрмон ёнғинлари, тахминан, уч ҳафтадан бери давом этмоқда. Расмийлар 8 киши бедарак йўқолгани ҳақида хабар берди.
Изоҳ (0)