Gretsiyada yirik o‘rmon yong‘inlari sodir bo‘lmoqda. Yuzlab uylar vayron bo‘ldi (foto va video)

Gretsiyaning Evbeya oroli va Afina shahri atrofidagi yong‘inlar 200 dan ortiq uyni butunlay vayron qildi yoki zararladi. Bu haqda Greek Reporter xabar berdi.

Evbeyada va Afina atrofidagi Varimpopida olov 8 ming gektardan ortiq maydonni qamrab oldi. Yong‘in xizmatining yuzga yaqin xodimi yong‘inlarni bartaraf qilish choralarini ko‘rmoqda. Uchta qishloq aholisini evakuatsiya qilish buyurilgan.

Bundan tashqari, odamlar orolning shimoli-g‘arbiy sohilidagi Istiyeya shahriga ko‘chishga chaqirilgan. So‘nggi 24 soat ichida hammasi bo‘lib o‘ndan ortiq qishloq evakuatsiya qilindi.

Shu bilan birga, Evbeyada yong‘inlar soni o‘sishda davom etmoqda. Limni shahri merining o‘rinbosari Argyris Liaskos yong‘in nazoratsiz tarqalishda davom etayotgani sababli havo o‘t o‘chirish kuchlarini faollashtirishga chaqirdi.

Varimpopida 70 dan ortiq uy yong‘in tufayli jiddiy zarar ko‘rdi. Rasmiylarning ta’kidlashicha, o‘t o‘chiruvchilarning sa’y-harakatlari tufayli shahar atrofidagi yong‘inlar bilan bog‘liq vaziyat yaxshilanmoqda.

Shu bilan birga, xabarlarga ko‘ra, 3-avgust kuni Afina shimolida yong‘inlar avj olgan. Qutqaruvchilar 81 ta o‘rmon yong‘inini o‘chirgan.

To‘qqizta vertolyot, yettita samolyot yordamida 500 dan ortiq o‘t o‘chiruvchilar va 305 politsiyachi Parnitsa tog‘i yon bag‘ridagi zich o‘simliklar orasida tarqalgan yong‘inlarni o‘chirdi. Mamlakat rasmiylari Tatoydagi sobiq qirollik mulkidan qimmatbaho buyumlarni boshqa joyga ko‘chirdi. Fuqaro muhofazasi xizmati Olimpiya shaharchasi aholisiga uylarini tark etishni buyurdi. Yetti kishi nafas olish muammosi bilan kasalxonaga yotqizilgan. Avvalroq bolalar yozgi lagerdan evakuatsiya qilingan edi. Ot klublari otlarni olovdan qutqarish uchun ularni qo‘yib yubormoqda.

Yong‘in oqibatida elektr ta’minoti tizimiga zarar yetdi, bu esa Afina yaqinidagi ba’zi hududlarda jiddiy xavf tug‘dirmoqda. Shuningdek, yong‘in poyezdlar harakatini to‘xtatdi, ba’zi avtomobil yo‘llari yopildi.