Qozog‘istonda Qarag‘anda viloyati hokimi viloyatning Yer munosabatlari boshqarmasi rahbari Halil Maqsudovni ishdan oldi. Maqsudov ayni karantin davrida qizining to‘yini o‘tkazganlikda ayblangan, deb yozadi Tengrinews.
Qarag‘anda viloyati hokimi o‘z qarorini viloyat hokimligida o‘tkazilgan apparat yig‘ilishida e’lon qildi.
“Bugundan boshlab Yer munosabatlari boshqarmasi rahbari Maqsudov Halil Mukatayevich karantin qoidalarini qo‘pol ravishda buzgani — pandemiya paytida to‘y tadbirlari tashkil etgani sababli lavozimidan ozod etildi. Men sizni yana ogohlantiraman: bunday huquqbuzarliklar uchun jazo juda qattiq bo‘ladi. Bu yerda davlat xizmatchisi etikasining barcha me’yorlari buzilgan. Koronavirus infeksiyasiga qarshi kurash sohasida amalga oshirilayotgan ulkan ishlarga bepisandlik qilmang. Aholining hafsalasini pir qilmang. Lavozimingiz yoki ish joyingizdan qat’i nazar, javobgar bo‘lasiz!”— dedi viloyat hokimi Jenis Qosimbek.
7-avgust kuni ijtimoiy tarmoqlarda viloyatdagi Arista restorani yonida qimmatbaho mashinalar yig‘ilib turgani tasvirlangan videolavhalar tarqaldi. Video mualliflarining ta’kidlashicha, restoranda Yer munosabatlari boshqarmasi boshlig‘i Halil Maqsudov qizining to‘yi bo‘lib o‘tgan. Aytishlaricha, to‘yga 500 kishi taklif qilingan, ular orasida yuqori martabali amaldorlar ham bo‘lgan. Mahalliy faollardan birining aytishicha, bazmda mehmon sifatida Qarag‘anda viloyati politsiya boshqarmasi vakili ham bo‘lgan. Shundan so‘ng viloyat hokimligi rasmiy tekshiruv e’lon qildi.
Viloyat hokimligida qayd etilishicha, sanitariya-epidemiologiya choralari buzilgani munosabati bilan Arista restoranining egalariga nisbatan obyektning faoliyatini to‘xtatish choralari ko‘riladi.
Izoh (0)