Afg‘oniston xavfsizlik kuchlari “Tolibon” harakati jangarilari bilan janglarda mamlakat shimolidagi Qunduz va Saripul viloyatlarining ma’muriy markazlari ustidan nazoratni qo‘ldan boy berdi. Shuningdek, “Tolibon” harakati Tojikiston bilan chegara yaqinida joylashgan Toxar shimoliy viloyati poytaxti Talukan shahrini egallab olganini ma’lum qildi. Shu tariqa “Tolibon” nazorati ostiga o‘tgan viloyat markazlari soni beshtaga yetdi, deb yozadi Anadolu agentligi.
Saripul viloyati mahalliy kengashi deputati Asadulla Xurram ma’lum qilishicha, jangarilar 7-avgust, shanba kuni ma’muriy markazga hujum boshlagan, 8-avgust, yakshanba kuni u to‘liq “Tolibon” nazorati ostiga o‘tgan. Xavfsizlik kuchlari shahar tashqarisidagi harbiy lagerga chekingan.
Qunduz mahalliy kengashi deputati Amriddiniy Valiy, o‘z navbatida, viloyatning ma’muriy markazi ikki kun davom etgan to‘qnashuvlardan keyin “Tolibon” qo‘liga o‘tganini ma’lum qildi. Uning so‘zlariga ko‘ra, politsiya ma’muriy binolari ham jangarilar nazorati ostida. Xavfsizlik kuchlari va mahalliy hukumat Qunduz aeroportiga chekingan. Guvohlar so‘zlariga ko‘ra, Qunduzni egallab olgach, jangarilar qamoqxonalardan mahbuslarni ozod qilgan.
Shuningdek, 8-avgust, yakshanba kuni “Tolibon” harakati Toxar shimoliy viloyati ma’muriy markazi — Talukan shahrini egallab olganini e’lon qildi. Viloyat qonun chiqaruvchi organi raisi o‘rinbosari Ruxolla Raufiy ma’lum qilishicha, xavfsizlik kuchlari xodimlari va mahalliy hukumat vakillari Farxar uyezdiga borib joylashgan.
Uning so‘zlariga ko‘ra, jangarilar barcha jamoatchilik binolariga kirib borgan hamda mahalliy qamoqxonalardan mahbuslarni ozod qilgan. Ular Talukanga taxminan ikki hafta avval hujum boshlagan.
“Tolibon”ning o‘zi bergan bayonotga ko‘ra, guruh Talukandagi barcha jamoatchilik binolari ustidan nazorat o‘rnatgan.
Talukanning qulashi bilan, “Tolibon” nazorati ostiga o‘tgan Afg‘oniston viloyatlari ma’muriy markazlari soni beshtaga yetdi.
Juzjon viloyatiga berilgan aviazarbadan oldin “Tolibon” ikki kecha-kunduz davom etgan janglar oqibatida viloyatning Shibirg‘on shahrini qo‘lga kiritgan edi. U “Tolibon” tomonidan so‘nggi bir sutka ichida egallab olingan ikkinchi ma’muriy markazga aylangandi.
Bungacha ular Eron bilan chegaradagi Nimruz viloyati poytaxti Saranj shahriga bostirib kirgan edi, bu esa “Tolibon” so‘nggi besh yil ichida Afg‘oniston viloyatlaridan birining ma’muriy markazini egallab olishi bilan bog‘liq birinchi holat bo‘ldi.
Izoh (0)