AQSh prezidenti Jo Bayden “Tolibon”ning pozitsiyalari kuchayganiga qaramay, Afg‘onistondan qo‘shinlarni olib chiqish rejalarini o‘zgartirmoqchi emas. Bu haqda The New York Times xabar berdi.
Bundan oldin, Bayden ma’muriyati ziddiyatni hal qilish bo‘yicha muzokaralarni davom ettirar ekan, Afg‘oniston hukumati “Tolibon”ga qarshilik ko‘rsatish uchun kuch va resurslarga ega ekaniga umid bildirgandi. Biroq 8-avgust kuni “Tolibon” respublika shimoliy viloyatlarining biryo‘la uchta ma’muriy markazini — Qunduz, Saripul va Talukanni egallab oldi.
Shunga qaramay, AQSh prezidenti ma’muriyatining strategiyasi “o‘zgarishsiz qolmoqda”, dedi yuqori martabali amaldor. Uning qo‘shimcha qilishicha, Pentagon kerak paytda Afg‘oniston hukumatini zarur resurslar bilan ta’minlash rejalaridan voz kechmaydi.
AQSh va uning ittifoqchilari Afg‘onistondan qo‘shinlarini olib chiqa boshlagach, “Tolibon” respublikada keng ko‘lamli hujumlar boshladi. Iyul oyining boshiga kelib, Afg‘onistondan harbiy kontingentning 90 foizdan ortig‘i olib chiqildi. Baydenning so‘zlariga ko‘ra, qo‘shinlarni avgust oxirigacha to‘liq olib ketish rejalashtirilgan.
“Tolibon” Afg‘oniston chegarasining 90 foizi va mamlakatning ko‘p qismini o‘z nazoratiga olganini ma’lum qildi.
“Tolibon” hujumlari fonida AQSh Afg‘onistonga o‘zining B-52 Stratofortress bombardimonchilarini yubordi. Respublika Mudofaa vazirligi ma’lumotlariga ko‘ra, ular bir kun oldin jangarilarga shimoliy Juzjon viloyati poytaxti Shibirg‘onda hujum uyushtirgan. Undan oldin, jangarilar u yerdagi ma’muriyat va politsiya binosiga bostirib kirgan, lekin oxir -oqibat, mahalliy xavfsizlik kuchlari o‘z pozitsiyalarini qaytarib olgan.
Avvalroq Rossiya Afg‘onistondagi hokimiyat “Tolibon” jangarilari tomonidan to‘liq egallab olinishi ssenariysiga tayyorligi, ammo voqealarning bunday rivojlanishini haqiqatdan yiroq deb hisoblashini ma’lum qilgandi.
Izoh (0)