Koronavirusga chalinish bo‘yicha ilk holatlar AQShda 2019-yil dekabr oyida, Uxandan ancha oldin sodir bo‘lgan. Bu haqda Xitoy Xalq Respublikasi Kommunistik partiyasining ingliz tilida chiqadigan The Global Times gazetasi xabar berdi.
Xususan, gazetadagi maqola mualliflari Amerikaning The Palm Beach Post nashriga tayanib, xabar berishicha, 2019-yilning dekabrida yoki 2020-yilning yanvarida Floridada 26 kishining koronavirus bilan kasallangani aniqlangan, ulardan sakkiz nafari xorijga sayohat qilmagan yoki COVID-19 bilan kasallangan boshqa bemorlar bilan aloqada bo‘lmagan edi. Mualliflarning qo‘shimcha qilishicha, Florida hukumati may oyida 171 bemor haqidagi ma’lumotlarni o‘chirib tashlagan. Gap hududdagi COVID-19 bilan kasallanish bo‘yicha birinchi holatlar haqida bormoqda.
May oyida Floridada 171 bemorning ma’lumotlari o‘chirilgani to‘g‘risida The Palm Beach Post yozgandi. Nashrda aytilishicha, ushbu bemorlarda koronavirusning birinchi alomatlari va testlarning ijobiy natijalari yanvar–fevral oylarida — mamlakatda COVID-19 bilan kasallanish bo‘yicha dastlabki ma’lumotlar berilishidan oldin paydo bo‘lgan.
Mualliflarning Sog‘liqni saqlash vazirligidagi qaydlarga asoslanib, da’vo qilishicha, kasallik faqat Xitoyda tarqalmoqda deb hisoblanilayotgan paytda — 1-yanvardayoq AQShda infeksiyaning ilk simptomlari paydo bo‘lgan.
Keyinchalik, ushbu masala bilan shug‘ullangan ma’lumot tahlilchilaridan biri Rebekka Jons Sog‘liqni saqlash vazirligi ma’lumotlaridan noqonuniy foydalanganlikda ayblangan. Iyun oyida sud jurnalistga qarshi jinoyat ishini yopish bo‘yicha himoya tomonining arizasini rad etdi.
The Global Times, o‘z navbatida, Uxan universiteti virusologi Yang Chjansyuning sharhiga tayanib, koronavirus AQShda Xitoydan ertaroq paydo bo‘lgan bo‘lishi mumkinligini ta’kidladi. Gazeta maqolasi mualliflarining fikricha, COVID-19 dunyoning bir qancha joylarida bir vaqtning o‘zida paydo bo‘lgan bo‘lishi mumkin.
Pandemiya boshlanganidan beri AQSh bir necha bor Xitoy hukumatini koronavirusning butun dunyoga tarqalishida aybdor deb atagan.
May va iyun oylarida Amerika ommaviy axborot vositalarida koronavirus Uxan shahridagi laboratoriyada yaratilganidan dalolat beruvchi belgilar haqida materiallar paydo bo‘la boshladi. Xabarlarga ko‘ra, olimlar SARS-CoV-2 koronavirusidan tabiiy paydo bo‘ladigan koronavirusda qayd etilmagan genetik izlarni topgan.
Shuningdek, britaniyalik va norvegiyalik olimlar COVID-19 odamlar tomonidan yaratilganiga oid dalillar borligini aytgan. Ularning fikriga ko‘ra, COVID-19 laboratoriyada yaratilgan, shundan so‘ng xitoylik olimlar “izlarni yashirish uchun” virusning ko‘rshapalaklardan kelib chiqqani to‘g‘risidagi versiyani ilgari surgan.
Iyun oyida JSST rahbari Tedros Gebreyesus tashkilot COVID-19 kelib chiqishi bo‘yicha tekshiruvning ikkinchi bosqichiga tayyorgarlik ko‘rayotganini ma’lum qilgandi. Gebreyesus buning uchun Xitoydan oshkoralik va hamkorlik talab etilishini aytgan.
Izoh (0)