Qozog‘istonning Turkiston viloyatidagi qishloqlar aholisi O‘zbekistonda yondirilayotgan axlattepalardan azob chekmoqda. Tutun chegaradan o‘tib, Alpamis batir va Kokterek qishloqlarini qoplab olmoqda. Bu haqda “Xabar 24” nashri yozmoqda.
Chegaraga yaqin joylashgan ikkala qishloq fuqarolari O‘zbekiston tomonidan kelayotgan qalin tutun sharoitida yashashga majbur, deyiladi xabarda. Chegaraning narigi tomonida chiqindi poligoni joylashgan bo‘lib, u yerda axlatlar muntazam yondirib turiladi.
Aholi mahalliy hukumatga ko‘p marta shikoyat qilgan, ammo ular qo‘shni mamlakatda yuz berayotgan vaziyatga kuchli ta’sir o‘tkaza olmayapti, deyiladi xabarda.
“Kechqurun ko‘chaga chiqqing, bemalol dam olging, toza havodan nafas olging keladi. Lekin toza havo yo‘q. Chiqishing bilan har tomondan hid kelishni boshlaydi”, — dedi Alpamis batir qishlog‘i fuqarolaridan biri.
Tutun qishloq aholisining salomatligiga ham ta’sir qilmoqda. Tibbiyot xodimlarining so‘zlariga ko‘ra, ularga yurak va nafas organlari kasalliklari bo‘yicha shikoyatlar bilan murojaat qiluvchilar soni oshgan.
“Shunday fuqarolar borki, yuqori qon bosimi va insult bilan dispanser hisobida turadi. Tutun tufayli ularning kasalligi rivojlanyapti. Bundan tashqari, tutundan homiladorlar va bolalar ham qiynalyapti. Ayniqsa, astma va surunkali pnevmoniyasi borlar”, — dedi tibbiy ambulatoriya katta shifokori Tasbolat Karimov.
Axlattepaning o‘zi Toshkentdan 17 km uzoqlikda joylashgan. U yerga shaharning to‘rtta tumanidan chiqindi olib kelinadi. Muammoni 2019-yildan buyon hal qila olishmayapti. O‘sha yili poligonga chegaradosh Keles tumani hokimi, viloyat maslahati deputatlaridan iborat Qozog‘iston delegatsiyasi borgan edi. Poligon xususiy mulkda joylashgan bo‘lib, uning egasi 2021-yil oxirigacha bu yerda chiqindini qayta ishlash zavodini qurishga va’da bergan edi.
Shu yilning aprelida ushbu masala ikki mamlakat bosh vazirlari darajasida ko‘tarildi. O‘shanda poligonni boshqa joyga ko‘chirib o‘tkazish haqida kelishuvga erishilgandi. Yaqin orada Turkiston viloyati vakillari yana delegatsiya to‘plab O‘zbekistonga tashrif buyurmoqchi.
Izoh (0)