Indoneziyaning Yava orolida Merapi vulqoni otila boshladi, deb xabar bermoqda Associated Press.
8-avgust, yakshanba kuni ertalab vulqon krateridan ulkan kul tutuni tepaga ko‘tarilib, bir necha aholi punktlariga yog‘ilgan. Kamida yetti marta vulqondan lava otilishi kuzatilgan.
Hukumat vulqondan 5 km radiusda yashaydigan aholidan o‘z uylarini tark etishni so‘radi. Hozircha tabiiy ofatdan jabrlanganlar haqida ma’lumot yo‘q.
Ta’kidlanishicha, Merapi vulqoning kuchli otilishi so‘nggi marta 2010-yilda kuzatilgan. O‘shanda 347 kishi halok bo‘lgan.
Merapi — Indoneziyadagi eng faol uyg‘oq vulqon. U Markaziy Yava provinsiyasida, Jokyakarta shahridan 30 km uzoqlikda joylashgan. Uning balandligi 2910 metrga teng.
Eslatib o‘tamiz, iyul oxirida Indoneziyaning Sumatra orolidagi Sinabung vulqoni faollashgan, tutun ustuni 4,5 kilometr balandlikkacha ko‘tarilib, yaqin hududlarda joylashgan shaharlarni vulqon kuli qoplab olgan edi.
Shuningdek, may oyida Kongo Demokratik Respublikasi sharqida joylashgan Niragongo vulqoni otilishi oqibatida 15 kishi halok bo‘lgandi.
Izoh (0)