Ekstremal va juda qimmat transport vositalariga bo‘lgan qiziqishi sabab tanilgan shayx Hamad Bin Hamdan Ol Nahayon o‘z kolleksiyasini yana bir avtomobil bilan to‘ldirdi, deb xabar beradi CARakoom.
Shayx o‘zining Instagram’dagi sahifasiga yangi mashinani sahroda sinovdan o‘tkazayotgani tasvirlangan videoni joylashtirgan. Bir qarashda kadrda oddiy Ram 1500 pikapi tasvirlangandek, biroq yaxshilab e’tibor berilsa, uning juda katta ekanligini ko‘rish mumkin.
Aslida, ushbu avtomobil Ram 1500 hamda Amerikada 1990-yillar oxirida ishlab chiqarilgan o‘rta motorli Stewart&Stecenson M1078 yuk mashinasining gibridi hisoblanadi. Ikkinchi modelning shassisidan foydalanilgan.
Dodge’dan yangi yo‘ltanlamasga to‘rt eshikli kuzov nasib etgan, biroq unga biroz o‘zgartirish kiritilgan. Masalan, haddan ortiq uzaytirilgan old qismi ko‘zga yaqqol tashlanadi. Bu pikap kapoti ostidan oltita silindrga ega 7,5 litrli Caterpillar turbodizel dvigateli o‘rin olganini bildiradi. Uning quvvati e’lon qilinmagan — ushbu motorlar 275 yoki 330 ot kuchini taqdim etishga qodir. Nima bo‘lganda ham, ikkala variantning ham maksimal tezligi soatiga 94 kilometr tezlik bilan cheklangan.
Ulkan pikap narxi e’lon qilinmagan.
Shayx bundan oldin 2020-yilning oktabrida uch qator o‘rindiqqa ega uzaytirilgan Jeep Wrangler Rubicon’ni xarid qilgandi. Bundan tashqari, Hamad Bin Hamdan Ol Nahayon dunyodagi eng katta yo‘ltanlamasga egalik qiladi — beshta o‘qqa ega 11 metrli “maxluq” og‘irligi 24 tonnaga yetadi. U 15,2 litrli dizel dvigatel yordamida harakatga keladi.
Izoh (0)