Xitoyda Chjenchjou shahrida kuzatilgan keng ko‘lamli suv toshqinlari oqibatida jabrlangan avtomobillar uchun maxsus avtoturargohlar paydo bo‘ldi. Twitter’dagi Sixth Tone akkauntida e’lon qilingan suratlarda turli markadagi minglab mashinalarni ko‘rish mumkin — ularning aksariyatiga jiddiy shikast yetgan va qalin loy qatlami bilan qoplangan. Hatto premium markalarning avtosalonlariga ham ziyon yetgan: South China Morning Post nashrining droni suv ostida qolgan o‘nlab Mercedes-Benz mashinalarini tasvirga olgan, deb xabar beradi Motor.
Sixth Tone ma’lumotlariga ko‘ra, favqulodda tashkil etilgan avtoturargohda turli darajada shikastlar yetgan 400 ming avtomobil quritilmoqda. Ularning aksariyati qalin loy qatlami bilan qoplangan, katta qismining yukxona va oynalari ochiq. Suratlardagi evakuatorlarga ko‘ra, avtomobillar kelishni davom etmoqda. Quritilgan mashinalarning aksariyati auksionlar orqali sotiladi.
Tabiiy ofat avtosalonlarga ham jiddiy zarar yetkazgan. Masalan, South China Morning Post droni yordamida tasvirga olingan videoda Chjenchjoudagi Mercedes-Benz markazini ko‘rish mumkin. Diler mashinalarni bino tomiga olib chiqishga majbur bo‘lgan. Egalari tomonidan avtomobillar qoldirib ketilgani sabab yo‘llarda ham tirbandliklar yuzaga kelgan.
Xenan provinsiyasida kuchli yog‘ingarchilik 16-iyul kuni boshlangan. Bir necha kun davom etgan yog‘ingarchilik provinsiya poytaxtida suv toshqinlarini yuzaga keltirgan.
Izoh (0)