Namanganda koronavirusga qarshi qo‘llanilgan vaksinalar soni 1 milliondan oshdi. Bu haqda viloyat Sog‘liqni saqlash boshqarmasi boshlig‘i Abdulhodi Iminov ma’lum qildi, deya xabar beradi “Daryo” muxbiri Azizbek Abduvaliyev. Qayd etish joiz, Sog‘liqni saqlash vazirligi ma’lumotlari bo‘yicha 31-iyul holatiga ko‘ra viloyatda 977 mingdan ortiq vaksina qo‘llanilgan.
Mutasaddiga ko‘ra, ularning 620 ming nafari vaksinaning birinchi dozasi bilan emlangan. Hozirda viloyat bo‘yicha 234 ta emlash punkti va 54 ta mobil guruh faoliyat olib bormoqda.
“31-iyul kuni Namanganga 162 ming doza Moderna vaksinasi keltirildi. Bugun ushbu turkum viloyatimizning barcha shahar-tumanlariga yetkazildi. Shu tariqa viloyatimizda koronavirusga qarshi qo‘llanayotgan vaksinalar soni 4 taga yetdi”, — deydi Abdulhodi Iminov.
Ma’lumot uchun, Namanganda jami 1,7 milliondan ortiq kishini koronavirusga qarshi emlanishi ko‘zda tutilgan. Hozirda viloyat emlanish ko‘rsatkichlari bo‘yicha mamlakatda yetakchilik qilmoqda.
Izoh (0)