Namanganda ham aholini koronavirusga qarshi emlash tadbirlari boshlandi. Bu haqda “Daryo” muxbiri Azizbek Abduvaliyev xabar bermoqda.
Viloyat Sanitariya-epidemiologik osoyishtalik va jamoat salomatligi boshqarmasi immunoprofilaktika bo‘limi mudiri Sherzod Latifjonovning ma’lum qilishicha, Namanganga 48 000 doza Yevropaning AstraZeneca vaksinasi va 51 200 doza O‘zbekiston—Xitoy ZF-UZ-VAC 2001 vaksinasi keltirilgan.
Emlashning birinchi bosqichida viloyatdagi 106 ming nafar 65 yoshdan yuqori aholi vakili va 39 mingdan ortiq tibbiyot xodimlarini qamrab olish rejalashtirilgan.
Namangan shahridagi vaksinatsiya tadbirlari boshlab berilgan 14-oilaviy poliklinika bosh shifokori Nafisa Tursunqulovaning aytishicha, bugunning o‘zida 70 kishini emlash rejalashtirilgan. Hozircha kelganlarning aksariyat qismi AstraZeneca vaksinasini ma’qul ko‘rmoqda.
— Vaksinatsiyaga o‘zim va turmush o‘rtog‘im bilan keldik. Mahallamizga biriktirilgan hamshira bizga bu jarayonning hammasini batafsil tushuntirib berdi, shuning uchun cho‘chimay kelaverdik. Hozir vaksina olganimga yarim soat chamasi bo‘ldi, oddiy ukoldek taassurot qoldi, noxush alomatlarni sezmadik, — deydi Namangan shahridagi “Madaniy maorif” mahallasida istiqomat qiluvchi 70 yoshli No‘monjon Tursunov.
Oxirgi ma’lumotlarga qaraganda, Namangan viloyatida hozirgacha 200 nafardan ortiq odam koronavirusga qarshi emlandi. Ularning eng yoshi ulug‘i Namangan shahrida yashovchi 87 yoshni qarshilagan Ahmadjon ota Ismoilov bo‘ldi.
— O‘tgan yili koronavirus infeksiyasiga chalinib, 45 kun yotib qoldim. Bu kasallik qanchalik xavfli ekanligini menga tushuntirishning hojati yo‘q. Shuning uchun vaksinalash boshlanayotganligini eshitib, o‘z xohishim bilan poliklinikaga keldim, — deydi nuroniy.
Ma’lumot uchun, Namangan viloyati bo‘yicha jami 238 ta emlash punkti tashkil etilgan. 293 ta emlash brigadasi va 54 ta mobil guruh faoliyat olib bormoqda.
Izoh (0)