Koronavirusning delta (“hindcha”) shtammi Yaqin Sharq va Shimoliy Afrikada kasallanish holatlarining o‘sishiga olib keldi, dunyoning ushbu qismida koronavirusning to‘rtinchi to‘lqini kuzatilmoqda. Bu haqda Jahon sog‘liqni saqlash tashkiloti (JSST)ning Sharqiy O‘rta Yer dengizi mintaqaviy byurosiga asoslanib, “Interfaks” xabar berdi.
“Viruga chalinib, kasalxonaga yotqizilayotgan odamlarning aksariyati emlanmagan. Hozir biz mintaqada COVID-19’ning to‘rtinchi to‘lqinini boshdan kechiryapmiz”, — dedi byuro direktori Ahmad al-Mandxari.
Ayni paytda delta shtamm mintaqadagi 22 ta davlatning 15 tasida — Marokashdan Pokistongacha qayd etilgan. “Delta shtammning yoyilishi JSSTning Sharqiy O‘rta Yer dengizi mintaqasidagi ko‘plab mamlakatlarda COVID-19’ga chalinish holatlari va o‘limlarning ko‘payishiga olib kelmoqda”, — ta’kidladi byuro rahbari.
JSST ma’lumotlariga ko‘ra, so‘nggi bir oy ichida virus yuqtirganlar soni iyun oyiga nisbatan 55 foizga, kasallikdan vafot etganlar soni esa 15 foizga oshgan. Haftasiga o‘rtacha 310 mingdan ortiq yuqtirish va 3,5 ming o‘lim holatlari qayd etilmoqda. Shuningdek, mintaqaning turli mamlakatlarida reanimatsiya bo‘limlarida kislorod ballonlari va ko‘rpa-to‘shaklarning halokatli tanqisligi haqida xabar berilgan.
Jahon sog‘liqni saqlash tashkilotining xulosa qilishicha, koronavirusning delta varianti mintaqada juda tezlik bilan ustuvorlikka erishayotgan shtammga aylanmoqda.
Avvalroq Jahon sog‘liqni saqlash tashkiloti (JSST) bilan bir qatorda olimlar “hindcha” shtamm virusning asl variantidan ancha yuqumliroq ekanini tasdiqlagan edi. Vaksina olganlar ham delta shtammni boshqalarga yuqtirishi mumkinligi ma’lum bo‘lgan.
Izoh (0)