Jons Hopkins universiteti ma’lumotlariga ko‘ra, dunyoda COVID-19 bilan kasallanganlar soni 196 631 596 kishini tashkil qilmoqda. 4 199 002 kishi virus oqibatida vafot etgan.
Kasallanish holatlarining ko‘pligi bo‘yicha AQSh (34,7 million), Hindiston (31,5 million), Braziliya (19,8 million), Fransiya (6,14 million) va Rossiya (6,13 million) eng oldinda bormoqda.
Avstraliyaning Sidney shahrida COVID-19’ga chalinish bo‘yicha sutkalik rekordlar fonida karantin rejimiga rioya qilinishi ustidan harbiylar ham nazorat olib boradi.
Yangi Janubiy Uels shtati politsiyasi ma’lumotlariga ko‘ra, 30-iyul, juma kuni shaharga qariyb 300 nafar harbiy joylashtiriladi. Avstraliya mudofaa vaziri Piter Datton aytishicha, harbiylar kelasi haftadan karantin qoidalariga amal qilinishini nazorat etishda politsiyaga ko‘maklashishni boshlaydi.
Izolyatsiya rejimi bir oyga uzaytirilgan Sidneyda 29-iyul kuni bir kecha-kunduzda 239 kishida koronavirus aniqlandi, bu pandemiya boshidan buyon rekord ko‘rsatkichdir.
Vaziyat yomonlashishi tufayli Yangi Janubiy Uels shtati bosh vaziri Gledis Berejiklyan Sidneyda cheklovlar kuchaytirilishini e’lon qildi, u yerda karantin choralari shundoq ham bir oydan buyon amal qilib kelmoqda. Sidneyning janubi-g‘arbiy va g‘arbiy tumanlari aholisi endi ko‘chalarda niqob taqishi kerak bo‘ladi, shuningdek, uydan 5 kilometrdan ko‘proqqa uzoqlashishga ruxsat berilmaydi.
Sidney hukumati 28-iyul kuni shahardagi karantin 28-avgustga qadar uzaytirilishini e’lon qildi. Dastlab bu rejim 31-iyulda yakunlanishi rejalashtirilgan edi.
Ishsiz holda izolyatsiya rejimida qolib ketgan Sidney aholisiga moddiy kompensatsiya taqdim etiladi.
Italiyada COVID-19 bilan bog‘liq vaziyatni mustaqil monitoring qilish bilan shug‘ullanuvchi Gimbe fondi mamlakatda koronavirusning to‘rtinchi to‘lqini boshlandi, degan xulosaga keldi.Fond ma’lumotlariga ko‘ra, 21—27-iyul kunlari Italiyada koronavirus oqibatidagi o‘limlar soni yana o‘sgan. Bungacha ketma-ket 15 hafta davomida ushbu ko‘rsatkich mamlakatda pasayib kelgan edi. Bundan tashqari, o‘tgan hafta virus yuqtirish holatlari 64 foizga o‘sgan (31 963 ta holat, taqqoslash uchun bir hafta avval 19 390 ta bo‘lgan). Bundan tashqari, Italiya kasalxonalarida intensiv terapiya bo‘limlarida yotgan bemorlar 14,5 foizga ko‘paygan.
28-iyul holatiga, Italiya aholisining 63,6 foizi koronavirusga qarshi vaksinaning kamida bitta dozasini olgan, 52,3 foizi esa to‘liq emlangan.
COVID-19’ni boshdan kechirgandan keyin koronavirusning Spike-oqsillarini neytrallashtiruvchi antitanalarni ishlab chiqish jarayoni yoshi katta odamlarda yoshlarga nisbatan ancha faolroq yuz beradi. Rossiyaning “Xelisk” laboratoriya xizmati va Kirov nomidagi harbiy-tibbiy akademiyaning qo‘shma tadqiqotlari natijalari shundan darak bermoqda.“Katta yoshli odamlarda COVID-19’ni boshdan kechirgandan keyin IgG sinfidagi antitanalar miqdori ancha yuqori bo‘lib chiqmoqda: 60-70 yosh guruhida antitanalarning o‘rtacha miqdori 20-30 yosh guruhidagidan ikki marta ko‘proq bo‘ldi, bu kasallanish darajasining og‘irligiga bog‘liq emas”, — deyiladi “Xeliks” kompaniyasi press-relizida.
Kompaniya tibbiy direktori Dmitriy Denisovning aniqlik kiritishicha, yoshi kattalarda antitanalar miqdorining katta bo‘lishini ularning immun tizimi butun hayoti davomida yoshlarnikiga qaraganda ko‘proq antigenlar bilan to‘qnashgani va immunizatsiyaga yaxshiroq reaksiya ko‘rsatishi bilan bog‘lash mumkin.
Shuningdek, tadqiqotlarda koronavirusni og‘ir shaklda o‘tkazgan bemorlarda antitanalar ko‘proq ishlab chiqarilishi hamda IgG antitanalari ayollar va erkaklarda kasallikdan keyin turli muddatlarda shakllanib, saqlanib qolishi ma’lum bo‘ldi.
Mavzuga doir: Olimlar COVID-19’ga chalingan odamlarda antitanalar bir yildan uzoq saqlanib qolishi mumkinligini aniqladi
- Shuningdek, Saudiya Arabistoni hukumati 1-avgustdan boshlab koronavirusga qarshi to‘liq emlangan kishilarning mamlakatga sayyohlik vizalari bilan kirishiga ruxsat beradi. Faqat mamlakatda ma’qullangan vaksinalar hisobga olinadi, shuningdek, Saudiya Arabistoniga kirishdan avval 72 soat ichida PZR-test topshirish kerak bo‘ladi.
- Bangkok kasalxonalarida koronavirusning delta shtammiga chalingan bemorlar oqimi tufayli joylar qolmadi. Poytaxt kasalxonalarida kuniga ming nafargacha bemorlar qabul qilinishi mumkin, ammo 29-iyul kunining o‘zida faqat Bangkokda to‘rt ming kishida kasallik aniqlangan. Shahardagi karantin markazlari to‘lib ketgan, poytaxt hukumati qo‘shimcha o‘rinlar yaratish maqsadida xususiy klinikalar bilan ish olib bormoqda. 29-iyul kuni Tailandda kasallanish holatlari bo‘yicha yangi rekord qayd etildi — 17 669 kishida kasallik aniqlandi, 165 kishi vafot etdi.
Izoh (0)