Коронавируснинг дельта («ҳиндча») штамми Яқин Шарқ ва Шимолий Африкада касалланиш ҳолатларининг ўсишига олиб келди, дунёнинг ушбу қисмида коронавируснинг тўртинчи тўлқини кузатилмоқда. Бу ҳақда Жаҳон соғлиқни сақлаш ташкилоти (ЖССТ)нинг Шарқий Ўрта Ер денгизи минтақавий бюросига асосланиб, «Интерфакс» хабар берди.
«Вируга чалиниб, касалхонага ётқизилаётган одамларнинг аксарияти эмланмаган. Ҳозир биз минтақада COVID-19’нинг тўртинчи тўлқинини бошдан кечиряпмиз», — деди бюро директори Аҳмад ал-Мандхари.
Айни пайтда дельта штамм минтақадаги 22 та давлатнинг 15 тасида — Марокашдан Покистонгача қайд этилган. «Дельта штаммнинг ёйилиши ЖССТнинг Шарқий Ўрта Ер денгизи минтақасидаги кўплаб мамлакатларда COVID-19’га чалиниш ҳолатлари ва ўлимларнинг кўпайишига олиб келмоқда», — таъкидлади бюро раҳбари.
ЖССТ маълумотларига кўра, сўнгги бир ой ичида вирус юқтирганлар сони июнь ойига нисбатан 55 фоизга, касалликдан вафот этганлар сони эса 15 фоизга ошган. Ҳафтасига ўртача 310 мингдан ортиқ юқтириш ва 3,5 минг ўлим ҳолатлари қайд этилмоқда. Шунингдек, минтақанинг турли мамлакатларида реанимация бўлимларида кислород баллонлари ва кўрпа-тўшакларнинг ҳалокатли танқислиги ҳақида хабар берилган.
Жаҳон соғлиқни сақлаш ташкилотининг хулоса қилишича, коронавируснинг дельта варианти минтақада жуда тезлик билан устуворликка эришаётган штаммга айланмоқда.
Аввалроқ Жаҳон соғлиқни сақлаш ташкилоти (ЖССТ) билан бир қаторда олимлар «ҳиндча» штамм вируснинг асл вариантидан анча юқумлироқ эканини тасдиқлаган эди. Вакцина олганлар ҳам дельта штаммни бошқаларга юқтириши мумкинлиги маълум бўлган.
Изоҳ (0)