“Milliy falokat”: Turkiyada yuz berayotgan o‘rmon yong‘inlari — suratlarda

Turkiyada o‘rmon yong‘inlari bir necha kundan buyon davom etmoqda, yong‘in kurort shaharlargacha yetib keldi. Marmaris shahri ma’muriyati mahalliy aholi va sayyohlarni evakuatsiya qilishni boshlashga qaror qildi. Antaliyadan sayyohlarni evakuatsiya qilish masalasi ko‘tarilmagan. Rossiya yordam uchun aviatsiya yubordi. Mamlakatdagi yong‘inlar va unga qarshi ko‘rilayotgan choralar haqida “RBK” fotoreportaj tayyorladi.

Yong‘inlar 28-iyul kuni kuchli shamol va issiq ob-havo tufayli boshlangan. Ular Turkiyaning janubiy viloyatlariga ta’sir ko‘rsatdi, jumladan, yong‘in o‘chog‘i Marmaris va Antaliya kabi kurort shaharlar yaqinida joylashgan (yong‘in Antaliya viloyatidagi Manavgat shahri atrofida tarqalgan).

Rossiya yong‘inni bartaraf qilishga yordam berish uchun uchta Be-200 samolyotini yubordi. Yong‘inlar oqibatida uch kishi halok bo‘lgan, yuzdan ortiq odam jarohatlangan. 29-iyulga kelib Manavgat tumanidagi asosiy o‘choqlarni nazoratga olishga muvaffaq bo‘lindi, deyiladi Turkiyadagi Rossiya elchixonasi xabarida. Elchixonaning ta’kidlashicha, asosiy mehmonxonalar va sayyohlik obyektlari yong‘indan uzoqroqda joylashgan.

Turkiya prezidenti Rajab Erdo‘g‘onning matbuot kotibi Ibrohim Kalinning fikricha, o‘rmon yong‘inlari Turkiya uchun milliy falokatga, haqiqiy ofatga aylangan.

“O‘rmon yong‘inlari milliy ofatdir. Bizning barcha bo‘limlarimiz olovga qarshi kurashni muvofiqlashtirgan holda qattiq ishlamoqda. Yong‘inlarning sabablari prokuratura tomonidan har tomonlama o‘rganilmoqda”, — deyiladi Kalinning Twitter’dagi postida.

U yong‘inlarni bartaraf etish bo‘yicha ishlar to‘xtovsiz davom etishini ta’kidlagan.

Kalinning postidan bir soat oldin Twitter’da Turkiya adliya vaziri Abdulhamid Gyul tomonidan yong‘inlar to‘g‘risida xabar joylashtirilgan. Uning qayd etishicha, yong‘inlarning sabablari prokuratura tomonidan tekshirilmoqda, prokuratura barcha ehtimoliy versiyalarni ko‘rib chiqmoqda, davlat organlari esa zarur choralarni ko‘rmoqda.

Turkiyaning Bodrum shahri meri Ahmad Aras bergan so‘nggi ma’lumotlarga ko‘ra, Bodrumda o‘rmon yong‘ini o‘chirilgan. Evakuatsiya qilingan sayyohlar o‘z mehmonxonalariga qaytdi, hech kim jarohat olmagan.

Shahar merining ta’kidlashicha, evakuatsiya paytida hamma dengizga olib chiqilgan. Uning so‘zlariga ko‘ra, hozir Bodrumdagi barcha yong‘inlar o‘chirilgan, “betakror o‘rmonning katta maydoni” yonib ketgan.

Aras qo‘shni Marmaris atrofidagi yong‘inlar hali bartaraf etilmaganini qo‘shimcha qildi. Avvalroq Turkiyaning qishloq va o‘rmon xo‘jaligi vaziri Bekir Pakdemirli yetti viloyatda o‘rmon yong‘inlari davom etayotgani haqida xabar bergan.