Россия Афғонистондаги ҳокимият «Толибон» жангарилари томонидан тўлиқ эгаллаб олиниши сценарийсига тайёр, аммо воқеаларнинг бундай ривожланишини ҳақиқатдан йироқ деб ҳисоблайди. Бу ҳақда Россия Ташқи ишлар вазирлигининг Иккинчи Осиё департаменти директори Замир Кабулов айтиб ўтди.
«Авваламбор, биз ушбу сценарий ишламайди деган фикрдамиз, аммо ҳар хил сценарийларга тайёрмиз. Турли хил вариантларни кўриб чиқдик ва таҳлил қилдик, демак, биз бунга тайёрмиз », — дейди Кобулов матбуот анжуманида Афғонистондаги вазиятга изоҳ бериб.
Унинг қўшимча қилишича, нима бўлган тақдирда ҳам Афғонистон ҳудудининг ярмидан кўпи «Толибон» назорати остида. Ҳозирда «Толибон» 417 туманнинг 200 дан ортиғини назорат қилмоқда, деди Кабулов аввалроқ АҚШ эълон қилган ҳисоб-китобларга асосланиб. Унинг сўзларига кўра, Афғонистон ҳукумат кучлари сўнгги бир ҳафта ичида 30 та туманни қайтариб олганини маълум қилган.
«Толибон»нинг ўзи Афғонистон ҳудудининг 85 фоизини ва чегараларининг 90 фоизини назоратга олганини даъво қилган. Афғонистон Мудофаа вазирлиги вакили ўринбосари Фавад Аман ушбу маълумотларини рад этган. Фавад Аманнинг маълум қилишича, Афғонистон ҳукумат кучлари «Толибон» жангариларини Ғарбий Ҳирот вилоятининг Карух туманидан қувиб чиқарган.
Аввалроқ «Толибон» Афғонистонда президент Ашраф Ғани бошчилигидаги Вазирлар Маҳкамаси истеъфога чиқса ва музокаралар йўли билан янги ҳукумат тузилсагина, сулҳ тузишга тайёрлигини билдирганди.
Изоҳ (0)