O‘zbekistonda “Sputnik V” vaksinasini ishlab chiqarish keyingi haftadan boshlanadi. Bu haqda Shavkat Mirziyoyev 29-iyul kuni Olmaliqqa tashrifi davomida ma’lum qildi.
Ushbu vaksina Olmaliqdagi zavodda ishlab chiqarilishi kutilmoqda. Korxonaning yillik quvvati 10 million doza vaksina bo‘ladi. Boshlang‘ich bosqichda esa 2 million doza.
Eslatib o‘tamiz, may oyida Rossiyaning “Sputnik V” vaksinasini O‘zbekistonda ishlab chiqarishni yo‘lga qo‘yish bo‘yicha kelishuvga erishilgani ma’lum qilingan edi. O‘zbekiston tomoni bunday taklif bilan 2020-yilning dekabridayoq chiqqan va ishlab chiqarish maydonchasi sifatida Tashkent Pharma Park hududini taklif qilgan edi.
Rossiya Xavfsizlik kengashi kotibi o‘rinbosari Rashid Nurgaliyev 26-iyul kuni “Rossiyskaya gazeta”ga bergan intervyusida O‘zbekiston yaqin orada Rossiyaning “Sputnik V” vaksinasini ishlab chiqarishni yo‘lga qo‘yishni rejalashtirayotganini ma’lum qilgandi. O‘zbekiston dori vositasi ishlab chiqariladigan hududni ham tanlaganini ham aytgandi.
Prezident Shavkat Mirziyoyev 28-iyul, chorshanba kuni bo‘lib o‘tgan videoselektorda “Sputnik V” va o‘zbek-xitoy vaksinasini ishlab chiqarish muhokama qilinayotganini, mamlakat o‘z vaksinasini ham JSSTga taqdim etishni, buning uchun katta pullar ajratilayotganini bildirdi.
Izoh (0)