26—27-iyul kunlari Qashqadaryo viloyatida kuchli shamol va chang bo‘ronlari kuzatildi. Buning oqibatida yuzlab uylar elektr energiyasi ta’minotidan uzilib qolgan, deb xabar beradi viloyat Uy-joy kommunal xizmat ko‘rsatish boshqarmasi axborot xizmati.
Ayniqsa, kuchli shamol Koson va Chiroqchi tumanlarida, shuningdek, Qarshi shahrida kuzatilgan. “Qashqadaryo hududiy elektr tarmoqlari” AJning ma’lum qilishicha, viloyatidagi elektr tarmoqlarining 5—10 foiziga jiddiy shikast yetgan. Talafotlarni bartaraf etish uchun 60 dan ortiq guruh tuzilgan, ular kecha-yu kunduz ta’mirlash ishlarini olib bormoqda.
Ma’lum qilinishicha, shamol oqibatida Qarshi shahar “Gungon” MFYda joylashgan 3-sonli ko‘p qavatli uy-tom qismining 80 metr kvadrat tunuka qoplamasi zararlangan. Qashqadaryo viloyat Favqulodda vaziyatlar boshqarmasi mutaxassislari qisqa muddatlarda voqea joyiga yetib borib tabiiy ofat oqibatlarini bartaraf etgan.
Ta’kidlash kerakki, “O‘zgidromet” 25—26-iyul kunlari respublikaning ba’zi viloyatlarida shamol tezligi 25-30 metr/soniyagacha kuchayishi mumkinligini ma’lum qilgandi.
Izoh (0)