AQShning Florida shtati, Mayami yaqinidagi Syorfsayd shaharchasida qulab tushgan 12 qavatli turar joy binosi vayronalari ostida qolgan so‘nggi qurbon topildi va uning shaxsi aniqlandi. Bu haqda BBC xabar berdi.
Oxirgi bo‘lib topilgan ayolning ismi Estel Xedaya. Shu tarzda qurbonlar soni 98 kishiga yetdi.
Marhumaning akasi Ayki Xedayaning Amerika ommaviy axborot vositalariga aytishicha, politsiya 26-iyul kuni unga singlisining jasadi topilgani haqida xabar bergan.
23-iyul kuni qidiruv-qutqaruv guruhlari qidiruv ishlari yakunlanishini ma’lum qilgandi. O‘sha paytda Estel Xedaya hali topilmagan. Xedayaning dugonasi The Washington Post gazetasiga bergan intervyusida fojia yuz bergan joyda “hatto poydevorning osti ham tozalanganini” ta’kidlagan.
Keyinroq Mayami-Deyd okrugi gubernatori Daniella-Levin Kava qurbonlarning jasadlarini qidirish ishlari davom etayotganini aytdi, ammo “bunday qulash ostidan barcha qoldiqlarni qazib olish juda qiyin” ekanini ta’kidladi.
Uning so‘zlariga ko‘ra, politsiya jasadlar va shaxsiy buyumlarni qidirish uchun millionlab funt chiqindilarni “ehtiyotkorlik va sinchkovlik bilan” tekshirgan.
Eslatib o‘tamiz, 24-iyun kuni ertalab ushbu 135 ta xonadondan iborat 12 qavatli bino qulab tushgan edi. Ba’zi manbalarda 13 qavatli deb aytilgan bino nima sababdan qulagani noma’lum. 26-iyun kuni kechga kelib besh kishining jasadi topilgan, ikki yarador esa og‘ir ahvolda edi.
5-iyun kuni binoning omon qolgan qismi portlatib, to‘liq buzib tashlandi. Shu munosabat bilan bedarak yo‘qolganlarni qidirish vaqtincha to‘xtatilgan va buzish ishlaridan keyin qayta tiklanishi aytilgandi.
7-iyul kuni bino vayronalari ostidan omon qolganlarni qidirish to‘xtatildi. Bino qulab tushganidan ikki hafta o‘tib, tirik qolish ehtimoli nolga teng, degan Mayami-Deyd yong‘in xizmati boshlig‘ining yordamchisi Rey Jadalla bedarak yo‘qolganlarning oilalariga.
Izoh (0)