Leverkuzendagi kimyo zavodida sodir bo‘lgan kuchli portlash oqibatida bir necha kishi turli darajadagi jarohatlar olgan. Bu haqda Bild xabar bergan.
Hodisa Chempark sanoat zonasidagi Currenta korxonasida yuz bergan, bu yerda axlat va zaharli chiqindilar qayta ishlanardi. Avvaliga portlashning Bayer kimyo-farmatsevtika kompaniyasi zavodlarining birida kuzatilgani xabar qilingandi, biroq keyinchalik ushbu axborot inkor etildi.
Currenta ma’lumotiga ko‘ra, korxonaning kamida ikki nafar xodimi og‘ir jarohat olgan, yana bir nechta kishida yengil jarohatlar kuzatilgan. Besh nafar xodim hodisadan keyin yo‘qolib qolgan.
Keyinchalik FR nashri portlash oqibatida kamida 16 nafar odamning jarohat olganini xabar qildi. To‘rt nafar kishi og‘ir ahvolda ekanligi haqida ham ma’lumot berildi.
Ayni vaqtda zavoddagi asosiy yong‘in bartaraf qilingan, biroq o‘t o‘chiruvchilar qo‘shimcha olov o‘choqlarini o‘chirish ishlarini amalga oshirmoqda.
Portlashga nima sabab bo‘lgani hali aniqlanmagan, lekin bu borada ham surishtiruv ishlari olib borilmoqda.
Avval iyul boshida Rossiyada mehmonxona portlab ketgani va 2 kishi halok bo‘lgani, shuningdek, Eron poytaxti Tehron g‘arbida kuchli portlash yuz bergani haqida xabarlar berilgandi.
Izoh (0)