Floridada qulab tushgan 12 qavatli bino vayronalari ostidan omon qolganlarni qidirish to‘xtatildi

AQShning Florida shtati hukumati Mayami yaqinidagi Syorfsayd shaharchasida 12 qavatli turar joy binosi qulab tushgan joyda olib borilayotgan qidiruv-qutqaruv ishlarini to‘xtatdi. Bu haqda  Mayami-Deyd okrugi gubernatori Daniella-Livayn Kavaga tayanib, Meduza xabar berdi.

“Ayni paytda biz qidiruv-qutqaruv operatsiyasi uchun mavjud bo‘lgan barcha imkoniyatlarni astoydil ishga solib bo‘ldik”, — degan okrug rahbari.

7-iyul kuni kechqurun rasmiylar hodisa qurbonlari soni 54 kishiga yetgani haqida xabar berdi. Yana 86 kishi bedarak yo‘qolganlar ro‘yxatiga kiritilgan. Bino qulab tushganidan ikki hafta o‘tib, tirik qolish ehtimoli nolga teng, degan Mayami-Deyd yong‘in xizmati boshlig‘ining yordamchisi Rey Jadalla bedarak yo‘qolganlarning oilalariga.

Tekshiruv ma’lumotlariga ko‘ra, bedarak yo‘qolgan deb hisoblanayotgan, taxminan, 70 kishi uy qulab tushgan paytda haqiqatan ham bino ichida bo‘lgan. Biroq o‘sha kuni binoda bo‘lgani taxmin qilinayotgan yana 20 ga yaqin kishining qayerdaligi noma’lum bo‘lib qolmoqda.

Eslatib o‘tamiz, 24-iyun kuni ertalab ushbu 135 ta xonadondan iborat 12 qavatli bino qulab tushgan edi. Ba’zi manbalarda 13 qavatli deb aytilgan bino nima sababdan qulagani noma’lum. 26-iyun kuni kechga kelib besh kishining jasadi topilgan, ikki yarador esa og‘ir ahvolda edi.

5-iyun kuni binoning omon qolgan qismi portlatib, to‘liq buzib tashlandi.  Shu munosabat bilan bedarak yo‘qolganlarni qidirish vaqtincha to‘xtatilgan va buzish ishlaridan keyin qayta tiklanishi aytilgandi.