Tojikiston hamisha rasmiy Kobulni Afg‘onistondagi qonuniy hukumat deb bilgan va hech qachon “Tolibon” vakillari bilan uchrashuv yoki muzokara o‘tkazmagan. Bu haqda Tojikiston tashqi ishlar vaziri Sirojiddin Muhriddin jurnalistlarga aytib o‘tdi, deb yozadi Asia-Plus.
TIV vazirining so‘zlariga ko‘ra, so‘nggi paytlarda Afg‘onistonning Tojikiston bilan chegaradosh hududlarida vaziyat haqiqatan yomonlashdi, “ammo Tojikistonning ushbu yo‘nalishdagi chegaralari ishonchli himoyalangan”.
“Tojikiston rossiyalik chegarachilarni janubiy chegaralarga qaytarish bo‘yicha Rossiya bilan muzokaralar olib borayotgani yo‘q. Shuningdek, Afg‘oniston bilan chegaradagi keskinlik tufayli Dushanbeda Rossiya chegarachi-maslahatchilarining sonini ko‘paytirish rejalashtirilmayapti”, — dedi vazir.
Uning so‘zlariga ko‘ra, bugungi kunda Tojikiston Afg‘onistondan keluvchi qochqinlarning qanchasini qabul qilishi mumkinligi haqida aniq aytib bo‘lmaydi.
“Men ayrim hamkasblarim tomonidan respublika qabul qilishi mumkin bo‘lgan afg‘onistonlik qochqinlarning soni bo‘yicha aytilgan fikrlarga qo‘shilmayman. Biz bu masalada koronavirus pandemiyasi, qochoqlar lagerlarining tayyorligi, shuningdek, terrorchilar qochqinlar niqobi ostida mamlakatimizga kirishi mumkinligiga tayyormizmi yoki yo‘qligi bilan bog‘liq vaziyatni hisobga olishimiz kerak”, — deya ta’kidladi Muhriddin.
Avvalroq Tojikiston Mudofaa vazirligining Afg‘oniston bilan chegara yaqinida joylashgan harbiy poligonlariga Tojikiston hukumati bugungi kunda, taxminan, 100 ming afg‘onistonlik qochqinlarni qabul qilib, joylashtirishi mumkinligi xabar qilingandi.
Respublika Favqulodda vaziyatlar qo‘mitasi rahbarining o‘rinbosari, polkovnik Imomali Ibrohimzodning so‘zlariga ko‘ra, zaruriyatga qarab mamlakat Afg‘onistondan keladigan yanada ko‘proq qochqinlarni qabul qilishi mumkin. “Biz xalqaro tashkilotlar bilan respublikaning afg‘onistonlik qochqinlarni qabul qilish salohiyatini o‘rganib chiqyapmiz”, — degan edi polkovnik.
Bungacha Tojikistonning Jayhun tumanida afg‘onistonlik qochqinlarni vaqtinchalik joylashtirish uchun baza qurishga maxsus joy ajratilgani haqida xabar berilgan.
Eslatib o‘tamiz, 13—14-iyul kunlari Tojikistondagi Tog‘li Badaxshon muxtor viloyatining Murg‘ob tumani Qizil-Rabot qishloq jamoati orqali qirg‘iz millatiga mansub 347 nafar Afg‘oniston fuqarosi Tojikiston chegarasini kesib o‘tgandi. Keyinroq ularning barchasi, ulardan avvalroq chegarani kesib o‘tgan afg‘on qochqinlarining qolganlari ham o‘z vataniga qaytgan.
Izoh (0)