So‘nggi bir necha kundan buyon Qirg‘iziston prezidenti Sadir Japarov omma oldida quyoshdan himoya qiluvchi ko‘zoynak taqqan holda namoyon bo‘layotgan edi, deb yozadi Kloop. Ijtimoiy tarmoqlar foydalanuvchilari davlat rahbari bino ichida ham ko‘zoynagini yechmayotganiga e’tibor qaratib, buning sababi bilan qiziqa boshladi.
Xususan, 23-iyul kuni koronavirusga qarshi vaksina olgan vaqtida ham — 26-iyul kuni “Oltin Qirg‘iziston zargarlik zavodi” korxonasiga tashrifi chog‘ida ham ko‘zoynakda bo‘lgan.
Prezident matbuot xizmati ushbu holat yuzasidan izoh berdi.
“Davlat rahbariga pastki qovoq entropioni tashxisi qo‘yilgan, u jarrohlik aralashuvini talab qildi”, — deya aniqlik kiritildi.
Qovoqlar entropioni yoki xalq tili bilan aytganda qovoqning buralib qolishi — qovoqning cheti va kipriklar ichkariga, ko‘z kosasi tomonga qayrilib qolishidan iborat kasallik. Bu muammo ko‘zning doim qichishib bezovta bo‘lib turishiga olib keladi.
Eslatib o‘tamiz, Qirg‘iziston prezidenti Sadir Japarov 23-iyul kuni koronavirusga qarshi vaksina qabul qildi. Vaksinatsiyadan so‘ng Japarov fuqarolarni undan o‘rnak olib, koronavirusga qarshi emlanishga chaqirdi. Japarov Xitoyda ishlab chiqarilgan Sinopharm vaksinasining birinchi dozasini oldi.
Izoh (0)