AQSh Iroqdagi harbiy missiyasini 2021-yil oxirigacha yakunlashini e’lon qildi

AQSh Iroqdagi harbiy missiyasini 2021-yil oxirigacha tugatadi. Tegishli kelishuv haqida AQSh prezidenti Jo Bayden va Iroq bosh vaziri Mustafo al-Kozimiy Vashingtondagi uchrashuv yakunlari bo‘yicha ma’lum qildi, deb yozadi Meduza.

Kelasi yildan boshlab amerikalik harbiy xizmatchilar faqat Iroq harbiylarini o‘qitish va ularga konsultatsiya berish bilan shug‘ullanib, jangovar harakatlarda ishtirok etmaydi.

Jo Bayden Vashington Iroqda demokratiyaning mustahkamlanishini qo‘llab-quvvatlashini aytib, mamlakatda parlament saylovlari oktabrda bo‘lib o‘tishini xohlashini bildirdi (saylovlar avvalroq o‘tkazilishi kerak edi, ammo yanvarda ular kechiktirildi). Prezident AQShning xavfsizlik va terrorchilikka qarshi kurash sohasidagi hamkorlik tarafdori ekanini ta’kidladi.

Iroq IShIDga qarshi kurashda ortiq amerikalik harbiylarga ehtiyoj sezmaydi, dedi Kozimiy Bayden bilan uchrashuvdan avval Associated Press’ga bergan intervyusida. Uning so‘zlariga ko‘ra, Iroq xavfsizlik kuchlari va armiyasi mamlakatni koalitsiya qo‘shinlarisiz ham himoya qilishga qodir.

Reuters qayd etishicha, harbiy missiyaning yakunlanishi haqidagi qaror ko‘p jihatdan rasmiy xususiyatga ega — aslida amerikalik harbiylar anchadan buyon iroqliklarni o‘qitish bilan shug‘ullanadi va jangovar operatsiyalarda kamdan-kam qatnashadi.

Ayni paytda Iroqda 2500 nafar amerikalik harbiy xizmatchilar bor.

AQSh Iroqqa 2003-yilda bostirib kirgan, mamlakatda hukmronlik qilgan diktator Saddam Husaynning terrorchilar bilan ehtimoliy aloqasi buning uchun rasmiy sabab bo‘lib xizmat qilgan. Husayn rejimi ag‘darilganidan keyin Amerika qo‘shinlari “Al-Qoida” va IShIDga qarshi mahalliy operatsiyalar o‘tkazish bilan shug‘ullangan.

Shu yilning 11-sentabriga qadar esa AQSh Afg‘onistondan barcha qo‘shinlarini olib chiqadi. Bu mamlakatda amerikaliklar 2001-yildan buyon bo‘lib turibdi.

Ayni paytda Afg‘onistondan AQSh qo‘shinlarining olib chiqilishi fonida mamlakatda hukumat va “Tolibon” o‘rtasidagi ziddiyat kuchaygan.

Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. So‘nggi ma’lumotlarga ko‘ra, AQSh Afg‘onistondagi harbiy kontingentining 90 foizdan ko‘prog‘ini olib chiqib ketdi.

Germaniya, Italiya va Avstraliya esa Afg‘onistondan o‘z qo‘shinlarini olib chiqishni yakunladi.