Namanganda 41 yashar er rashk sabab 34 yoshli turmush o‘rtog‘ini pichoqlab qo‘ydi. Bu haqda “Daryo” muxbiri Azizbek Abduvaliyev xabar bermoqda.
Voqea 2021-yil 23-iyul kuni tunda Norin tumanidagi “Yashiq” mahallasida sodir bo‘lgan. Kasbi tikuvchilik bo‘lgan ayol olgan buyurtmasini oxiriga yetkazish va tonggacha egasiga topshirish uchun chevarxonada bo‘lib turgan payt er mast holatda kelib janjal ko‘targan. Bunga go‘yo ayolning kechki vaqt ko‘p ushlanib qolayotgani sabab bo‘lgan.
Erkak qo‘lidagi oshxona pichog‘i bilan rafiqasining o‘ng bilagi va chap ko‘kragiga zarba bergan. Buning oqibatida ayol og‘ir tan jarohati olib, voqea joyida halok bo‘lgan.
Mazkur oila er-xotinning ikkinchi turmushi bo‘lib, ularning 5 va 2 yoshli o‘g‘il farzandlari voyaga yetayotgan edi. Shu kunning o‘zida qo‘lga olingan shaxs qilmishiga to‘la iqrorligini bildirgan va jinoyat qurolini IIB xodimlariga topshirgan.
Ushbu holat bo‘yicha Norin tuman prokuraturasi tomonidan Jinoyat kodeksining 97-moddasi 1-qismi bilan jinoyat ishi qo‘zg‘atildi. Hozirda tergov harakatlari olib borilmoqda.
Namangan viloyati IIB boshlig‘i Odil Otaxo‘jayev boshchiligida 26-iyul kuni Norin tumani hokimi, sektor rahbarlari, mas’ullar va hudud aholisi ishtirokida hodisa muhokamasi o‘tkazildi. Unda so‘nggi paytlarda sodir bo‘layotgan jinoyatlarning aksariyat qismi arzimas sabablar ortidan yuzaga kelayotgani, bu kabi jinoyatlar takrorlanmasligi uchun huquq-tartibot idoralari va fuqarolarning o‘zaro hamkorligi zarurligi haqida so‘z bordi.
Izoh (0)