Наманганда 41 яшар эр рашк сабаб 34 ёшли турмуш ўртоғини пичоқлаб қўйди. Бу ҳақда «Дарё» мухбири Азизбек Абдувалиев хабар бермоқда.
Воқеа 2021 йил 23 июль куни тунда Норин туманидаги «Яшиқ» маҳалласида содир бўлган. Касби тикувчилик бўлган аёл олган буюртмасини охирига етказиш ва тонггача эгасига топшириш учун чевархонада бўлиб турган пайт эр маст ҳолатда келиб жанжал кўтарган. Бунга гўё аёлнинг кечки вақт кўп ушланиб қолаётгани сабаб бўлган.
Эркак қўлидаги ошхона пичоғи билан рафиқасининг ўнг билаги ва чап кўкрагига зарба берган. Бунинг оқибатида аёл оғир тан жароҳати олиб, воқеа жойида ҳалок бўлган.
Мазкур оила эр-хотиннинг иккинчи турмуши бўлиб, уларнинг 5 ва 2 ёшли ўғил фарзандлари вояга етаётган эди. Шу куннинг ўзида қўлга олинган шахс қилмишига тўла иқрорлигини билдирган ва жиноят қуролини ИИБ ходимларига топширган.
Ушбу ҳолат бўйича Норин туман прокуратураси томонидан Жиноят кодексининг 97-моддаси 1-қисми билан жиноят иши қўзғатилди. Ҳозирда тергов ҳаракатлари олиб борилмоқда.
Наманган вилояти ИИБ бошлиғи Одил Отахўжаев бошчилигида 26 июль куни Норин тумани ҳокими, сектор раҳбарлари, масъуллар ва ҳудуд аҳолиси иштирокида ҳодиса муҳокамаси ўтказилди. Унда сўнгги пайтларда содир бўлаётган жиноятларнинг аксарият қисми арзимас сабаблар ортидан юзага келаётгани, бу каби жиноятлар такрорланмаслиги учун ҳуқуқ-тартибот идоралари ва фуқароларнинг ўзаро ҳамкорлиги зарурлиги ҳақида сўз борди.
Изоҳ (0)