Toshkentda koronavirus bilan bog‘liq vaziyat yomonlashgani sabab MSKTga (multispiral kompyuter tomografiyasi) tushish va “Remdesivir” dori vositasining narxi ko‘tarilib ketdi. Hatto ba’zi joylarda narxlar ikki barobar farq qilmoqda, deb yozadi “Podrobno”.
Nashrning ta’kidlashicha, mamlakatda bozor iqtisodiyoti va xususiy markazlar, shuningdek, dorixonalar qonun bo‘yicha o‘z narxini belgilashga haqli. “Biroq hayot uchun kurashayotgan shunday og‘ir paytda tadbirkorlar balki aholiga yon bosishi kerakdir?”, — deya savol bilan murojaat qilingan.
Ma’lum qilinishicha, hozirda poytaxtda MSKT narxi 100-350 ming so‘m oralig‘ida. Qimmatroq bo‘lgan joylarda navbat uzun emas, narxlari arzon markazlarda esa odam juda ko‘p. Qayd etilishicha, narxi 220 ming so‘mgacha bo‘lgan barcha joyda 100-200 kishilik navbatlar bor.
Iste’molchilarning so‘zlariga ko‘ra, eng arzon MSKT — “Botkina” ro‘parasidagi diagnostika markazida (100 ming so‘m). Tabiiyki, bu yerda navbat juda uzun. Arzonligi bo‘yicha ikkinchi o‘rinda Bolalar ortopedik markazi joylashgan (115 ming so‘m). Shu bilan birga, narxlar muntazam o‘zgarib turmoqda, asosan, oshyapti.
Hindistonda ishlab chiqarilgan “Remdesivir” dori vositasining narxi Toshkent dorixonalarida 390 ming so‘mdan 800-900 ming so‘mga chiqib ketgan. Uning mahalliy muqobili esa 325-600 ming so‘m atrofida.
Avvalroq Toshkentda koronavirusga chalingan bemorlarni davolayotgan xususiy klinikalar ro‘yxati, narxi va manzillari e’lon qilingandi.
Eslatib o‘tamiz, 2020-yilning iyulida O‘zbekistonda profilaktika, kasallikning yuqishini oldini olish maqsadida ishlatish mumkin bo‘lgan dorilar qatoriga “Remdesivir” ham kiritilgan edi. O‘shanda JSST “Remdesivir”ni koronavirusga qarshi kurashda “umid uyg‘otuvchi” dori vositasi deb atagan. Preparat koronavirus ko‘payishini bloklash xususiyatiga ega ekanligi kanadalik olimlar tomonidan aprel oyida aniqlangandi. Keyinroq JSST COVID-19’ni davolash uchun “Remdesivir”ni qo‘llashga qarshi chiqqan.
Izoh (0)