O‘zbekistonning ayrim viloyatlarida Prezident maktabiga kirish imtihonlari bo‘lib o‘tdi. “Daryo” va O‘zA imtihonlar o‘tkazilayotgan joylardan fotosuratlarni taqdim etdi.
Pandemiya sabab 2020/2021-o‘quv yili uchun Prezident maktablariga qabul 2021-yilga qoldirilgandi. Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligi direktori Hilola Umarovaning yozishicha, 26, 27 va 28-iyul kunlariga belgilangan imtihonlar ochiq havoda va karantin choralariga rioya qilingan holda o‘tkaziladi.
Imtihonlarni ikki smenada o‘tkazish rejalashtirilgan edi: soat 08:00 dan 09:00 gacha va 19:00 dan 20:00 gacha. Ota-onalardan farzandlarini belgilangan vaqtdan kamida bir yarim soat oldin olib kelishlari so‘ralgan. Mamlakatdagi epidemiologik vaziyat tufayli imtihon vaqti 90 daqiqadan 60 daqiqagacha qisqartirildi.
“Daryo” muxbiri xabar berganidek, Qarshida test sinovlari 26-iyul kuni “Nasaf” stadionida bo‘lib o‘tgan. 2880 nafar bola uchun imtihonlar dushanba kuni 08:15 da boshlangan. Joriy o‘quv yilida Qashqadaryo viloyatida o‘quvchilar 5—10-sinflarga qabul qilinadi.
Dushanba kuni Namangandagi “Navbahor Umid” stadionida yana 6000 nafarga yaqin o‘quvchi 5 va 6-sinflar uchun imtihon topshirdi.
Bloger Isroil Tillaboyev o‘zining Telegram-kanalida minglab bolalar uchun test sinovlari Farg‘ona va Marg‘ilondagi stadionlarda bo‘lib o‘tganini ma’lum qildi va bolalar quyosh tig‘i ostida o‘tirishga majbur bo‘lganini tanqid qildi.
Qayd etish joizki, avvalroq sinoptiklar Eron hududlaridan juda issiq havo kirib kelishi hisobiga 24—26-iyul kunlari O‘zbekistonda yuqori harorat kuzatilishi haqida xabar bergan edi. Ushbu kunlarda havo harorati iqlimiy me’yorlardan 4—6 daraja yuqori bo‘lishi, kunduz kunlari havo harorati 41—44 darajagacha, janubda va cho‘l hududlarida ba’zi joylarda 45—46 darajagacha isishi aytilgan edi. FVV xavfsizlik choralarini ko‘rishni so‘rab SMS xabarnomalar yuborgandi.
“Gazeta.uz” iltimosiga ko‘ra, vaziyatga izoh bergan bola huquqlari bo‘yicha vakil Aliya Yunusova imtihonlarni ushbu kunlarda o‘tkazish bosh vazir Abdulla Aripov boshchiligida aprel oyida o‘tkazilgan yig‘ilish bayonnomasida ko‘zda tutilganini qayd etgan. Bolalar ombudsmani imtihonlarni qabul qilib oluvchi Buyuk britaniyalik mutaxassislarning O‘zbekistonga kelgani sababli kirish imtihonlari boshqa kunga ko‘chirilmaganini ham qo‘shimcha qilgan. Uning so‘zlariga ko‘ra, uzoq hududlardan kelgan bolalarning ota-onalari ham kirish imtihonlari sanalarining o‘zgarishiga qarshi bo‘lgan.
“Bolalar kirish imtihonlarini topshirishi uchun tegishli sharoitlar bilan ta’minlanishi kerak edi, deb hisoblayman. Haqiqatan ham, FVV, SSV hamda ‘O‘zgidromet’ anomal issiq, harorat 46 daraja va undan baland bo‘lishini prognoz qilgan edi. Harorat yuqori bo‘lishi munosabati bilan uyda bo‘lish tavsiya qilingandi. Tasvirlarda ayrim bolalarning haqiqatan ham bosh kiyimsiz, niqoblarda o‘tirgani aks etgan. Bunday haroratda quyosh nurlari to‘g‘ridan to‘g‘ri tushadigan ochiq joyda bo‘lish bola salomatligiga zarar yetkazishi mumkin”, — degan bolalar ombudsmani.
Aliya Yunusovaning so‘zlariga ko‘ra, Prezident, ijod va ixtisoslashtirilgan maktablarni rivojlantirish agentligi direktori Hilola Umarovaga imtihon topshirish uchun zarur sharoitlarni yaratishga oid ko‘rsatmalar va bolalar salomatligi uchun har qanday xavf-xatarlar bo‘yicha ogohlantirishlar berildi.
Izoh (0)