O‘zbekistonda tegishli avtomobil ishtirokida sodir etilgan yo‘l-transport hodisalari va avtomobil bilan bog‘liq boshqa ma’lumotlarni Yagona interaktiv davlat xizmatlari portali va Davlat xizmatlari markazidan olish mumkin bo‘ladi. Bu Prezident Shavkat Mirziyoyev tomonidan 24-iyul kuni imzolangan “Davlat xizmatlari ko‘rsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari to‘g‘risida”gi farmonda ko‘zda tutilgan.
Farmonga muvofiq, O‘zbekistonda 2022-yil 1-yanvarga qadar “avtomobil tarixi” ma’lumotlarini aniqlash davlat xizmati joriy etiladi, ma’lumotlarni olish uchun esa avtomototransport vositalariga berilgan davlat raqami asosida so‘rov berish yetarli bo‘ladi.
Ushbu xizmat orqali fuqarolar avtomobilning davlat ro‘yxatidan o‘tkazilgan sanasi, yurgan masofasi, fuqarolik-huquqiy shartnomalar tuzilganligi, yo‘l-transport hodisasi sodir etilganligi va boshqa ma’lumotlarni shartnomaviy asosda Davlat xizmatlari markazi va Yagona interaktiv davlat xizmatlari portali orqali olishlari mumkin bo‘ladi.
Farmon bilan Ichki ishlar vazirligi, Adliya vazirligi hamda Axborot texnologiyalari va kommunikatsiyalarini rivojlantirish vazirligiga ushbu davlat xizmatini 2022-yil 1-yanvarga qadar yo‘lga qo‘yish vazifasi yuklatilgan.
Mavzuga doir:
- O‘zbekistonda 2022-yildan aholi va tadbirkorlardan 15 turdagi hujjat va ma’lumotlarni so‘rash tartibi bekor qilinadi
- O‘zbekistonda “zagranpasport” 20 foizga arzonlashadi
- Shavkat Mirziyoyev chet eldagi vatandoshlar O‘zbekistonning davlat xizmatlaridan onlayn foydalana olishlarini ta’minlash haqida topshiriq berdi
Izoh (0)