Ўзбекистонда тегишли автомобиль иштирокида содир этилган йўл-транспорт ҳодисалари ва автомобиль билан боғлиқ бошқа маълумотларни Ягона интерактив давлат хизматлари портали ва Давлат хизматлари марказидан олиш мумкин бўлади. Бу Президент Шавкат Мирзиёев томонидан 24 июль куни имзоланган «Давлат хизматлари кўрсатиш инфратузилмасини такомиллаштириш ва аҳолининг давлат хизматларидан фойдаланиш имкониятларини кенгайтириш чора-тадбирлари тўғрисида»ги фармонда кўзда тутилган.
Фармонга мувофиқ, Ўзбекистонда 2022 йил 1 январга қадар «автомобиль тарихи» маълумотларини аниқлаш давлат хизмати жорий этилади, маълумотларни олиш учун эса автомототранспорт воситаларига берилган давлат рақами асосида сўров бериш етарли бўлади.
Ушбу хизмат орқали фуқаролар автомобилнинг давлат рўйхатидан ўтказилган санаси, юрган масофаси, фуқаролик-ҳуқуқий шартномалар тузилганлиги, йўл-транспорт ҳодисаси содир этилганлиги ва бошқа маълумотларни шартномавий асосда Давлат хизматлари маркази ва Ягона интерактив давлат хизматлари портали орқали олишлари мумкин бўлади.
Фармон билан Ички ишлар вазирлиги, Адлия вазирлиги ҳамда Ахборот технологиялари ва коммуникацияларини ривожлантириш вазирлигига ушбу давлат хизматини 2022 йил 1 январга қадар йўлга қўйиш вазифаси юклатилган.
Мавзуга доир:
Изоҳ (0)