Dunyo va o‘zbek sportiga oid 23-iyul kunining muhim xabarlari dayjesti bilan tanishing.
O‘zbekiston
Yaponiya poytaxti Tokioda to‘rt yillikning eng nufuzli musobaqasi — Olimpiya o‘yinlarining ochilish marosimi bo‘lib o‘tdi. Unda O‘zbekiston delegatsiyasi ham ishtirok etdi.
Marosim koronavirus pandemiyasi sabab muxlislarsiz o‘tkazildi.
“Paxtakor”ning ikki nafar sobiq futbolchisi yana jamoaga qaytdi. Klub matbuot xizmatiga ko‘ra, yarim himoyachilar Doston Hamdamov va Odiljon Hamrobekov “sherlar” bilan 2022-yilning oxirigacha mo‘ljallangan shartnoma imzolagan.
Har ikkala futbolchi o‘tgan mavsumda BAA chempionatiga yo‘l olgandi. Hamrobekov “Shabob Al-Ahli”da ijarada o‘ynagan bo‘lsa, Hamdamov “An-Nasr”ga transfer qilingandi. “An-Nasr” esa transferdan so‘ng Dostonni mavsum so‘ngigacha “Hatta” klubiga ijaraga bergandi.
Eldor Shomurodov “Roma”ga o‘tishi mumkin. Il Tempo’ning xabariga ko‘ra, 26 yoshli hujumchi rimliklarning bosh direktori Tiagu Pintuning nazariga tushgan. “Roma” bu borada “Jenoa” bilan aloqaga chiqqan, futbolchining narxi, taxminan, 15 million yevro bo‘lishi kutilmoqda.
“Match TV” nashri esa 22-iyul, payshanba kuni “Jenoa” bosh murabbiyi Davide Ballardinining 26 yoshli o‘zbekistonlik futbolchini sotishni taqiqlagani, shuningdek, Shomurodovning o‘zi ham boshqa jamoaga o‘tishni rejalashtirmayotgani haqida xabar bergandi.Jahon
“Manchester Yunayted” “Borussiya D” yarim himoyachisi Jeydon Sancho transferini e’lon qildi. “Qizillar” 21 yoshli futbolchi bilan 2026-yilgacha mo‘ljallangan bitim imzolagan. Sancho yangi jamoasida 25-raqam ostida to‘p suradi.
“Barselona” va “Yuventus” 8-avgust kuni “Kamp Nou”da Joan Gamper Kubogi doirasida o‘zaro to‘qnash keladi. Uchrashuvga 19 869 nafar tomoshabin tashrif buyurishi mumkin.
Joan Gamper Kubogi — “Barselona” tomonidan har yili avgust oyining ikkinchi yarmida tashkil etiladigan o‘rtoqlik musobaqasi hisoblanadi.
“Real” hujumchisi Karim Benzemada koronavirus aniqlandi. Bu haqda Madrid klubi matbuot xizmati xabar berdi.
Son Hyon Min “Tottenhem” bilan shartnomasini uzaytirdi. Janubiy koreyalik futbolchi “shporlar” bilan shartnomasini 2025-yilning 30-iyuniga qadar uzaytirdi. Son London klubida 2015-yildan beri harakat qiladi.
Kilian Mbappe “PSJ” bilan yangi shartnoma imzolamoqchi emas, deya yozmoqda Marca. Parijliklar Mbappeni jamoada olib qolish maqsadida unga 2026-yilga qadar mo‘ljallangan shartnoma taklif qilmoqda. Yangi shartnomaga ko‘ra Kilian yiliga 32 million yevro maosh oladi. Biroq Mbappe hozircha taklifni qabul qilmagan. U “Real”ga o‘tishni xohlamoqda. Fransuzning klub bilan amaldagi shartnomasi 2022-yilda yakuniga yetadi.
“Yuventus” Krishtianu Ronalduni Mauro Ikardiga almashishi mumkin. Corriere dello Sport nashrining yozishicha, agar “PSJ” hujumchisi Kilian Mbappe ushbu yozda “Real”ga o‘tsa, Ronaldu “PSJ”ga o‘tishi mumkin. Turin klubi esa Ronalduni hujumchi Mauro Ikardiga almashtirmoqchi. Shuningdek, Ronalduning o‘zi ham jamoasini o‘zgartirishga qarshi emasligi aytilmoqda.
Izoh (0)