“Bozor ko‘rgan klub”. Futbolchilar sotuvidan daromad ko‘rish bo‘yicha “Real”ni ham, “Barselona”ni ham dog‘da qoldirayotgan “Benfika”. Ular buni qanday uddalamoqda?

“Portugaliya an’anaviy ravishda futbolchilarni tarbiyalaydi va kuchli o‘yinchilarni sotadi. Ligamiz uzoq vaqt yuqori darajada tura olmaydi. Buning uchun top-ligalar singari qimmat telehuquqlar, klublarning esa kattagina budjeti va yosh futbolchilarni xarid qilish uchun moliyaviy kuch kerak bo‘ladi. Akademiyadan iste’dodli yoshlar avlodi yetishib chiqsa, klublar nimagadir erisha oladi. Bunga ko‘nib yashash kerak”, — deydi “Benfika” akademiyasi direktori Pedru Mil-Homens ESPN’ga bergan intervyusida

“Benfika” nega Yevropa va Janubiy Amerika uchun yosh iste’dodlar markaziga aylanganini mana shu iqtibos tushuntirib bera oladi, deya yozadi “Le Blog Sportif” blogi.

Bo‘lajak yulduzlar tengdoshlariga qaraganda kuchsizroq bo‘ladi — ular o‘z texnikalarini takomillashtirishi uchun muhit yaratib beriladi

“Benfika” akademiyasida 470 nafar tarbiyalanuvchi bor. Ular 6 yoshdan 13 yoshgacha bo‘lgan bolalarni qabul qilishadi.

“Boshqalar ko‘rmaydigan jihatlarni ko‘ramiz. Muvaffaqiyatimizning siri — kim katta futbolda ko‘ngildagidek faoliyat olib borishini bashorat qila olishimizda”, — degandi Goal bilan suhbatda “Benfika” akademiyasi texnik direktori Rodrigu Magalyesh.

Bular balandparvoz gaplardek tuyulishi mumkin, lekin haqiqatan ham futbolchilarning kuchli jihatlarini ko‘ra olish ularning ma’lum bir qolipga solinishi oldini oladi.

Yosh futbolchilar guruhida e’tibor natijalarga qaratilmaydi. Bolalar o‘yindan rohatlanishi, o‘zini erkin tutishi, o‘yinga chanqoq bo‘lishi va qiyinchiliklarni yengib o‘tishni o‘rganishi kerak.

Pedru Markesh, “Benfika” texnik direktori

Har bir futbolchida individual rivojlanish dasturi mavjud, ularda texnikadan to to‘g‘ri ovqatlanishgacha (murabbiylar o‘smirlar uchun 3 oylik reja tuzadi — avgustdan oktabrgacha, noyabrdan yanvargacha, fevraldan aprelgacha va har doim o‘tgan 12 haftani muhokama qiladi) kerakli ma’lumotlar bor.

“Bernardu Silva 9—13 yosh oralig‘ida ajoyib o‘yin ko‘rsatardi, 14—16 yoshda esa tengdoshlaridan yomonroq o‘yin namoyish etgandi, — dedi Magalyesh. — Silva, Joau Felikslarning ochilishi kutdik. Ular jismoniy jihatdan ortda qolsa-da, o‘yinni yaxshi o‘qirdi, to‘g‘ri qarorlar chiqarardi va texnik jihatlarni yaxshi o‘zlashtirgandi. Vazifamiz — futbolchilarga rivojlanishga imkon berish. Chunki jismoniy tomondan tengdoshlarini quvib o‘tsa, ular parvoz qiladi”.

Jismoniy jihatdan zaif bo‘lgan bolalar atrofdagilardan qolib ketmasligi va texnikasini rivojlantirishi uchun o‘zidan yoshi kichiklar guruhiga qo‘yiladi. Kuchliroq bolalar esa, aksincha, kattaroq guruhga yuboriladi. “Benfika” va Portugaliya terma jamoasi bo‘lajak yulduzlarining aksariyat qismi tengdoshlaridan ko‘ra zaifroq bo‘ladi. Hozirda “Manchester Siti”ning asosiy yulduzlaridan biri bo‘lgan Ruben Diash ham shu yo‘lni bosib o‘tgan.

Ruben “Benfika”ga kelganda o‘rtacha futbolchi edi. Mehnatsevarligi evaziga muvaffaqiyatga erishdi. Uning “Benfika”ga qarshi “Eshtrelu” U-11 da qanday o‘ynaganini ko‘rganman. Diash maydonda yetakchi edi. U barcha futbolchilar bilan muloqotda bo‘lar va himoyani mustahkam ushlab turardi. Rubenni yetakchilik va muloqot qila olish xislatlari bizga o‘tishiga yordam berdi

Rodrigu Magalyesh, “Benfika” texnik direktori

“Benfika” akademiyasidagilar 13 yoshdan boshlab haftasiga 7 soatdan maydonda mashg‘ulot o‘tkazadi, qo‘shimchasiga 90-120 daqiqa kamchiliklari ustida ishlaydi. Bu mashg‘ulotlar display panjaralar bilan o‘ralgan, uncha katta bo‘lmagan 360S nomli kvadrat maydonchada o‘tkaziladi.

Yosh vingerlarning mashg‘ulotlari mana shunday bo‘lib o‘tadi:

Agarda futbolchilar juda uzoq o‘ylasa va erinchoqlik qilsa, tizim ularni jazolaydi: maydonga ikkinchi to‘pni ham tashlaydi. Futbolchilar yaxshi ishlasa, ularga qaychi usulida zarba berishga ruxsat beriladi.

Mashg‘ulotlarning bir qismi individual o‘tkaziladi. Futbolchilar natijalarni darhol bilishi va o‘tgan mashg‘ulotdagi natijalar bilan bilan solishtirishi mumkin. Biz qandaydir alohida mashqlarga bog‘lanib qolmaganmiz va o‘zimiz ham ularni o‘ylab topishimiz mumkin. Shu tariqa bolalarga yoqadigan interfaol mashg‘ulotlar yuzaga keladi.

Nuni Maurisiu, Benfica Lab tahlilchisi va 360S murabbiyi

13 yoshgacha bolalar 4-3-3 sxemasida o‘ynaydi. Keyinchalik esa katta futbolga tezroq moslashish uchun boshqa sxemalarda o‘ynab ko‘radi

Futbolchilarning eng yaxshi xislatlarini yuzaga chiqarish uchun ularning ishonchini qozonish lozim. Ular nima qilayotgani va nima uchun bajarayotganini tushunishi kerak. Ular bilan bolaligidan birga shug‘ullanaman va qanday qilib ta’sir o‘tkazishni bilaman. Biz ko‘proq individual ishlaymiz, ularni oqilona tanqid qilish uchun o‘yinlardan qisqa lavhalar ko‘rsatamiz. Shunday uslublar orqali ular to‘laqonli shaxs, boshqalar oldida mas’uliyatli va jamoa uchun jon beradigan bo‘lib yetishadi.

Luis Nasimentu, “Benfika” U-15 murabbiyi 

13 yoshgacha bolalar 4-3-3 sxemasida o‘ynaydi. Keyinchalik esa katta futbolga tezroq moslashish uchun boshqa sxemalarda o‘ynab ko‘radi.

Ularga o‘yinni o‘qiy olish va to‘g‘ri qaror qabul qilishni o‘rgatishimiz lozim. Ularni doimo bitta sxemada o‘ynatish xato. Mabodo jamoa yoki murabbiy almashsa, ular keyin nima qilishni bilmay qoladi. Shuning uchun akademiyamizdagi futbolchilar Pep Gvardiolani yaxshi ko‘radi. Ular texnik jihatdan kuchli va turli xil uslublarni yaxshi tushunadi.

Luis Arauju, “Benfika” U-19 murabbiyi

APLning 2020/21-yilgi mavsumida chempionlikka erishgan “Manchester Siti” tarkibida “Benfika” akademiyasining 4 futbolchisi bor edi: Ruben Diash, Bernardu Silva, Joau Kanselu va Ederson. Ulardan ikkitasi jamoa tarixidagi eng qimmat transferlar uchligiga kiradi.

“Benfica Campus akademiyasi 2006-yilda ochildi va shu vaqga qadar klubga 500 million yevro atrofida daromad keltirdi, — deydi akademiya direktori Mil-Homens 2021-yil fevral oyida. — Bizning yillik budjetimiz 10—12 million yevroni tashkil qiladi, demak, investetsiya samara bergan: bitta akademiyaning qurilganidan buyon qilgan sof daromadi 250 million yevroni tashkil qiladi”.

Futbolchilarni tarbiyalay olish qobiliyati “Benfika”ni transferlar bo‘yicha dunyoning eng samarali jamoasiga aylantirdi.

Transfer daromadlari (15 yil ichida 1,2 milliard yevro) — Yevropada eng yuqori darajada (“Chelsi” va “Yuventus”dan sal ko‘proq).

Transfer balansi (+604,75 million) — birinchi o‘rinda. Keyingi o‘rinlarda “Portu” (+485, 34 million), “Ayaks” (+392,33 million) va “Lill” (+340,18 million).

“Benfika” o‘z futbolchilarini boshqalardan ko‘ra yaxshiroq sota oladi, lekin transferlarsiz ham daromad qilishni o‘rganmoqda

“Benfika” tarbiyalanuvchilar strategiyaning bir qismi ekanini yashirmaydi, transferlarsiz klub budjeti kamtarona ko‘rinish olardi. Katta bo‘lmagan Portugaliya (aholisi — 10 million) hech qachon Germaniya va Buyuk Britaniyadek iqtisodiy jihatdan kuchli bo‘la olmaydi, Portugaliya chempionati esa A Seriya yoki La Liga singari pul topa olmaydi.

Top-5 ligalardagi ko‘p jamoalar telehuquqlardan ham yaxshi daromad topadi. APLdagi eng oxirgi o‘rindagi jamoa ham mediahuquqlar orqali bizdan uch baravar ko‘p pul topadi, La Ligadagi oxirgi jamoa ham shuncha pul ishlab topadi. Bozor shunaqa, biz boshqa yo‘llarni izlashimiz lozim. Bizni noto‘g‘ri mamlakatdagi to‘g‘ri jamoa deyishadi. Portugaliya haqida yomon fikr bildira olmayman, shunchaki mamlakat kichkina. Agarda biz ushbu strategiyani Angliya yoki Ispaniyada qo‘llaganimizda, natijalar fantastik ko‘rinishda bo‘lardi.Domingush Soaresh de Oliveyra, “Benfika”ning ijrochi direktori 

“Benfika” Portugaliya chempionatidagi boshqa jamoalardan alohida yashaydi. 2013-yilda ular telehuquqlarini umumiy paketda sotishdan bosh tortdi va o‘z telekanalini ishga tushirdi. Asosiy tarkib va yoshlarning o‘yini uchun eng ashaddiy muxlislar obunani sotib olishi aniq edi. Shuning uchun birinchi mavsumda (2013/14) kanal voleybol, gandbol, basketbol va futbol bo‘yicha Gretsiya, Braziliya, MLS va APL o‘yinlarini namoyish etdi.

2013/14-yilgi mavsum oxirida obunachilar soni 300 mingdan oshdi va jamoa 28 million yevro atrofida daromad ko‘rdi. 2016-yilda daromad ikki martaga ko‘paydi.

“Avvallari telehuquqlar uchun bizga 7,5 million yevro to‘lashardi, hozir esa 40 million yevro daromad qilyapmiz. Demak, avval ham bizga to‘lashganidan ko‘proq pul olishimiz kerak bo‘lgan”, — deydi Domingush Soaresh de Oliveyra.

2020-yil yanvar oyida “Benfika” o‘yinlarni internet orqali translyatsiya qiladigan klubning shaxsiy platformasi — Benfica Play’ni ishga tushirdi. Obuna narxi oyiga 2-3 yevroni tashkil qiladi. To‘lovni kriptavalyuta orqali qilsa ham bo‘ladi.

“Kelajakda ushbu kontent asosiy daromad manbayiga aylanadi. Muxlislar va tomoshabinlar noyob narsa ko‘rishni istashadi va bu uchun ular pul to‘lashga tayyor”, — deydi de Oliveyra Benfica TV haqida.

Albatta, buning ortidan megadaromad qilish imkonsizdir, lekin bu transferlarga bog‘lanib qolmaslikka imkon beradi.