Isroilning xavfsizlik sohasida faoliyat yuritgan 600 ga yaqin sobiq amaldori, jumladan Mossad va Shin Bet tashkilotlari, armiya hamda diplomatik korpusning sobiq rahbarlari AQSH prezidenti Donald Trampga murojaat qilib, G‘azodagi urushni to‘xtatish uchun Isroil hukumatiga bosim o‘tkazishni so‘radi. Bu haqda BBC xabar berdi.
Ushbu murojaat G‘azoda urush to‘xtamayotgani, sulh bo‘yicha bilvosita muzokaralar to‘xtab qolgani va Isroil bosh vaziri Binyamin Netanyaxu harbiy harakatlarni kengaytirishga urinayotgani fonida e’lon qilindi.
“Muhim strategik maqsadlar allaqachon amalga oshirildi, HAMAS endilikda Isroil uchun strategik tahdid emas. Isroilliklarning katta qismida sizga nisbatan ishonch mavjud, bu esa Netanyaxuni urushni tugatishga undashingizda muhim omil bo‘lishi mumkin. G‘azodagi urushni to‘xtating. Oldin bunday ish Livanda ham qilingandi. Endi navbat G‘azoga”, deyiladi murojaatda.
Murojaatchilar orasida sobiq amaldorlar, jumladan bosh vazir Ehud Barak, mudofaa vaziri Moshe Ya’alon, Mossad tashkiloti rahbari Tamir Pardo va Shin Bet rahbari Ami Ayalon bor. Xususan, Ayalon murojaatda shunday degan:
“Bu avval adolatli urush edi. Barcha harbiy maqsadlar amalga oshirilgach, urush o‘z ma’nosini yo‘qotdi”.
Sobiq rasmiylarning Trampga murojaati garovdagi ikki isroillik harbiyning holsiz va ozib ketgan holdagi videosi e’lon qilinganidan so‘ng yuzaga kelgan. Bu tasvirlar Isroil va G‘arb yetakchilari tomonidan keskin tanqid qilinmoqda. Biroq Netanyaxu garovdagilarni “HAMASning harbiy yo‘l bilan tor-mor etilishi” orqali ozod qilish niyatida ekanini bildirgan.
Mossad (המוסד) – 1949-yilda asos solingan Isroil tashqi razvedka xizmati. Uning vazifasi quyidagilardan iborat bo‘lgan: Isroildan tashqarida razvedka ishlari olib borish; terrorizmga qarshi kurash; dushman davlatlarda maxfiy operatsiyalar o‘tkazish; qochqin yahudiylarni olib kelish va yadro qurollari hamda harbiy tahdidlarni kuzatish.
Ma’lumot uchun, G‘azo sektoridagi urush 2023-yil 7-oktyabr kuni HAMASning Isroil janubiga hujumi ortidan boshlangan. Yahudiy rasmiylariga ko‘ra, hodisa oqibatida Isroil tomonidan 1 200 kishi halok bo‘lgan, 251 kishi garovga olingan. HAMAS boshqaruvidagi G‘azo sog‘liqni saqlash vazirligi urush boshlanganidan buyon bugungacha anklavda 60 mingdan ortiq odam halok bo‘lganini ma’lum qilgan. Hozirda, qamal oqibatida hududda ocharchilik avj olmoqda. Rasmiylarga ko‘ra, 180 kishi, jumladan 93 nafar bola, yetarli oziq-ovqat yo‘qligidan yuzaga kelgan ocharchilik sabab vafot etgan.
Izoh (0)