O‘zbekistonlik gimnastikachi Oksana Chusovitina Instagram orqali murojaat qilib, uni qo‘llab-quvvatlagan barchaga tashakkur bildirdi. Chusovitina O‘zbekistonning Tokio—2020 dagi bayroqdori bo‘lishi belgilangan, biroq Olimpiadaga bir kun qolganda bayroqdorlar o‘zgargandi.
Qadrli muxlislarim, qo‘llab-quvvatlaganingiz uchun barchangizga katta rahmat. Keling, bugungi kunni xafagarchilikda o‘tkazmaymiz, bugun Ochilish marosimi. Bu kunni juda uzoq kutdik. Keling, xursandchilik qilamiz, jilmayamiz va barchaga muxlislik qilamiz. Yaqin orada musobaqalar boshlanadi. Munosib ishtirok etish uchun bizga xotirjamlik kerak. Hammaga katta rahmat, barchani quchib qolaman. Barchamizga omad yor bo‘lsin.https://www.instagram.com/p/CRqqwdzp0lz/Oksana Chusovitina, gimnastikachi
Qayd etish joiz, avvalroq Milliy olimpiya qo‘mitasi matbuot xizmati Olimpiada ochilish marosimida O‘zbekistonning ikki bayroqdoridan biri Oksana Chusovitina bo‘lishini e’lon qilingandi. Ikkinchisi esa boks bo‘yicha terma jamoa a’zosi Bobousmon Boturov bo‘lishi lozim edi.
Biroq ochilish marosimiga bir kun qolganda bayroqdorlar o‘zgardi va bokschi Bahodir Jalolov va taekvondochi Nigora Tursunqulova O‘zbekiston bayroqdorlari bo‘lishi e’lon qilindi.
Mazkur holat yuzasidan MOQ bosh kotibi Oybek Qosimov bayonot bergan, O‘zbekiston bayroqdorlarini tanlashda har bir sport turi bo‘yicha musobaqalar taqvimi, shuningdek, barcha delegatlar va sportchilarning fikri inobatga olingani haqida aytgandi.
Oksana Chusovitina bayroqdorlar o‘zgargani borasida hech kim unga izoh va tushuntirish bermagani, bu voqeadan keyin ishtiyoqi so‘ngani haqida gapirdi.
Turizm va sport vazirligi esa o‘z bayonotida Chusovitina o‘zining so‘nggi Olimpiadasiga jiddiy hozirlik ko‘rish maqsadida o‘z o‘rnini bo‘shatgani haqida ma’lum qildi.
Eslatib o‘tamiz, bu Oksana Chusovitina uchun faoliyatidagi sakkizinchi Olimpiada o‘yinlari hisoblanadi. Sportchi Tokiodagi Olimpiadadan so‘ng faoliyatini yakunlashini aytib o‘tgan.
Izoh (0)