Ulug‘bek Qodirov bugungi kunning eng iqtidorli o‘zbek aktyorlari biri. Oxirgi suratga tushgan “Uch qahramon” filmi ham ko‘plab eʼtiroflarga sazovor bo‘ldi. Qizig‘i shundaki, Ulug‘bek Qodirov tasodifan aktyor bo‘lgan. Ko‘plab hamkasblari singari bolalikdan sanʼatga qiziqmagan, bu sohani tanlagani yaqinlari uchun ham kutilmagan yangilik bo‘lgan.
Aktyor 1983-yilning 3-avgust kuni Toshkent shahrida tavallud topgan. Otasi Nosir, onasi Farida Qodirovalar kamtarona hayot kechirishgan. Ular ikki o‘g‘il va uch qiz farzandni tarbiyalashgan.
“Harbiy bilim yurtini tamomlash nasib qilmadi”
Nosir va Farida Qodirovalar kenja o‘g‘illarining harbiy soha vakili bo‘lishini orzu qilishadi. Chunki uning bo‘ylari baland, sportga bo‘lgan qiziqishi ham yuqori edi. Afsuski, yosh Ulug‘bekka harbiy bo‘lish nasib etmadi.
— Ota-onam haqiqatan ham harbiy bo‘lishimni orzu qilishgandi. 15 yoshimda Toshkentdagi Suvorov nomli harbiy bilim yurtiga o‘qishga kirdim, ammo uni bitirish menga nasib qilmadi. Kutilmaganda ko‘richak bo‘lib qoldim. Jarrohlik operatsiyasidan keyin shifokorlar jismoniy mashqlar bajarishni maʼlum muddatga taqiqlashdi. Ota-onam meni oddiy maktabga qaytarishga qaror qilishdi. Shunday qilib, harbiylik kasbi haqidagi orzu o‘z-o‘zidan barham topdi. Ammo bolaligimdan sportga qiziqishim yuqori bo‘lgan. Biroq o‘zim ham, atrofimdagi insonlar ham aktyor bo‘lishimni xayollariga keltirishmagan.
Bolaligim boshqalarnikidan farqli o‘tgan deyolmayman. Ota-onam kun bo‘yi ishda bo‘lishardi, biz esa uyda qolardik. Onam uy ishlarini barchamizga bo‘lib ketardi. Hamma zimmasiga yuklatilgan ishni qilishga majbur edi. Dadam o‘qimishli inson bo‘lgani uchun “Saodat” jurnaliga obuna bo‘lardi. Ishga ketayotganda jurnalning qaysi sahifalarini o‘qishimizni ham belgilab ketishardi, deydi aktyor Ulug‘bek Qodirov.
“Institut ostonasida qonim to‘kilgan”
Sanʼat institutiga hujjatlarimni tasodifan topshirganman. Institut binosi oldida ro‘y bergan voqeani taqdirning belgisi sifatida qabul qilganman.
— Bahorning iliq kunlarining birida do‘stlarim bilan Toshkentdagi Alisher Navoiy nomli milliy bog‘ga aylangani bordik. O‘sha kunlari onam menga yangi poyabzal olib bergandilar. Ko‘p yurganimdan tufli oyog‘imni shilib tashladi. Ammo yurishdan to‘xtamadim. Shunda xayolimga sanʼat institutining oldiga yetib olsam bo‘ldi, degan fikr keldi. Institut binosi oldiga yetib borganimda, oyog‘im yanada ko‘proq qonay boshladi. Bu qon institut darvozasi oldiga to‘kildi. O‘sha kuni kechqurun onamga “Sanʼat institutiga hujjat topshiraman!”, deb aytdim. Onam “Bu nima deganing?”, deb hayron bo‘ldilar. “Qonim to‘kilgan joyga o‘qishga kirmasam bo‘lmaydi”, deya javob berganman, deydi Ulug‘bek Qodirov.
Ulug‘bek Qodirov bo‘sh vaqtida detektiv janridagi kitoblar o‘qishni yaxshi ko‘radi.
Fe’l-atvori — o‘zini kamgap, bosiq inson deb ta’riflaydi.
U hurmat qilgan aktyorlar — Al-Pachino, Alen Delon, Bred Pitt.
Instagram’da 2,2 mln obunachisi bor va u ikki brendning ambassadori hisoblanadi.
“Kichik epizod rolga tasdiqlashgan ekan”
Aktyor 2000-yil O‘zbekiston davlat sanʼat va madaniyat institutiga qabul qilingan. U institutning eng ko‘rkam talabalaridan biri bo‘lishiga qaramay, ko‘pchilik uning sahnaga moslashib ketishiga shubha qilgandi. Bunga aktyorning injiqligi va biroz jizzakiligi sabab bo‘lgan bo‘lsa ajabmas.
— Ilk rolimni 2001-yili “Ayol zoti” serialida ijro etganman. “Kastingdan o‘tding”, deyishganida rosa xursand bo‘lgandim. Ammo kichik epizodga tasdiqlashgan ekan. Kamera qarshisida hayajon albatta bo‘lgan, ammo rolga moslashishim qiyin kechmagan. 2004-yili institutni bitirgandan so‘ng ketma-ket yangi filmlarga takliflar bo‘ldi. “Devona” va “Sarvinoz” filmlarida suratga tushganimdan keyin odamlar taniy boshlashdi, deydi aktyor.
“Otamga rollarimni ko‘rish nasib etmadi”
Aktyorning muvaffaqiyatli rollari ko‘p, ammo uning tanilishida “Sarvinoz” va “Baxt uchun million” rollari ko‘proq hissa qo‘shgan. Chunki 2005-yilda unga “Yilning eng yaxshi aktyori” nominatsiyasida g‘oliblik nasib etgan.
— 2004-yili ijodimdagi eng barakali yillardan biri bo‘lgan. Ammo hayotimda og‘ir judolik bo‘lgani bilan ham xotiramda qolib ketgan. Chunki endi tanilib, filmlarim namoyish etilayotgan pallada otamdan ayrilib qolganmiz. Otamga filmlarimni ko‘rish, premyeralarda old qatorda o‘tirib, tomosha qilish nasib etmagan. Bundan ko‘p afsuslanaman, deydi aktyor.
Ulug‘bek Qodirov bir oy yashab, ajrashgan…
Aktyor Ulug‘bek Qodirov 2012-yilning sentyabr oyida oila a’zolarining qistovi bilan uylangan. To‘y katta dabdaba bilan o‘tgan bo‘lishiga qaramay, kuyov bir oydan keyin ajrashishga qaror qilgan. Mish-mishlarga qaraganda, bunga kelinni yoqtirmay uylangani sabab bo‘lgan. 2013-yilning aprel oyida esa aktyor “Shahrizoda” guruhining aʼzosi Aziza bilan oila qurgan. Ular 2014-yili Iymona, 2016-yilda Amirbek, 2025-yilda esa Zubayda ismli farzandlarning ota-onasi bo‘lishgan. Ammo aktyor oilasi haqida gapirishni istamaydi, ular bilan bog‘liq foto va videolarni ham omma bilan bo‘lishmaydi.
“Osiyo arsloni” uchun tashlangan katta vazn
Aktyor Ulug‘bek Qodirov uchun qisqa muddatda ozish yoki semirish muammo emas. U “Aka” filmi uchun 26 kilogrammga semirgan. “Baron” filmi uchun esa avvalgi vazniga qaytishiga to‘g‘ri kelgan. Aktyor qisqa vaqtda 25 kilogramm vazn tashlashga muvaffaq bo‘lgan. Aktyorning taʼkidlashicha, u to‘plagan 120 kilogramm vazndan rol va salomatligi uchun voz kechishiga to‘g‘ri kelgan.
— Bu yil ham rol uchun katta vazn tashlashimga to‘g‘ri keldi. “Osiyo arsloni” filmida asosiy rolni ijro etyapman. Kuchaytirilgan parhez sabab 25 kilogramm vazn tashladim, deydi aktyor Ulug‘bek Qodirov.
Nega AQSHga ketgandi?
Ulug‘bek Qodirov oilasi bilan AQSHga ko‘chib ketgani maʼlum qilgandi. Ammo biror marta xorijga ketishining sabablarini ochiqlamadi. Faqatgina uning yaqin do‘sti va sport murabbiysi Habibulla Nizomov buning ayrim sabablarini maʼlum qilgandi.
— Filmlarda o‘zbek aktyorlariga salbiy rol yoki ikkinchi darajali rollarni berib, asosiy rollar rus yoki turk aktyorlariga berila boshladi. Bir filmda kelishilgan gonorarni berishmagan. Qayta-qayta so‘rab, agar pulimni bermasangiz, dublyajga bormayman, deganidan keyin kinoni buyurtma qilgan tashkilotga ro‘para qilib qo‘ygan. Tasavvur qiling, gonorarni kelishgan odam qo‘rqitish uchun boshqa tashkilotni ro‘para qilib qo‘ygan. Balki, adolatsizliklarni ko‘rib, men o‘zim yangidan hayot boshlab, alohida yashab ko‘ray, degandir, degandi Habibulla Nizomov.
Pitssa tarqatish bilan shug‘ullanganmi?
Aktyor birorta intervyusida AQSHdagi faoliyati haqida gapirmagan bo‘lsa-da, tinib-tinchimas muxlislar uning nima bilan shug‘ullanganini aniqlashgan. U barcha muhojirlar singari pitssa tarqatish bilan shug‘ullangan emish.
Muhimi, aktyor 3-4 yillik xorij safaridan so‘ng O‘zbekistonga qaytdi va bir nechta tarixiy loyihalarda suratga tushdi. U suratga tushgan “Alfons” seriali ham ko‘plab shov-shuvlarga sabab bo‘ldi. Bundan tashqari, aktyor qo‘shiqchilik faoliyatini ham boshladi.
Izoh (0)