Turizm va sport vazirligi nima sababdan Tokio—2020 Olimpiadasi ochilish marosimiga bir kun qolganda O‘zbekiston bayroqdorlari almashganiga izoh berdi.
So‘nggi pallada O‘zbekiston sport delegatsiyasi bayroqdorlari o‘zgardi. Chunki ertaga (24-iyul kuni — izoh “Daryo”) Bobousmon Boturov ringga chiqishi kerak. Xavfsizlik nuqtayi nazaridan ochilish marosimida ishtirok etadigan har bir kishi tadbirdan bir necha soat oldin stadionga yetib borishi, tadbir davomida tik oyoqda turishi, tekshiruvlardan o‘tishi lozim. Bu esa sportchilarni urintirib qo‘yishi tabiiy. Shuni inobatga olgan holda O‘zbekiston delegatsiyasi rahbariyati bayroqdorlarni o‘zgartirishga qaror qildi. Bobousmonning o‘rnini o‘zbek boksi faxri Bahodir Jalolov egalladi.Avvalroq MOQ Tokiodagi Olimpiya o‘yinlarida O‘zbekistonning bayroqdorlari gimnastikachi Oksana Chusovitina va bokschi Bobousmon Boturov bo‘lishi haqida ma’lum qilgandi. Biroq ochilish marosimiga bir kun qolganda bayroqdorlar o‘zgargan.O‘z navbatida 25-iyul kuni bahslarga kirishadigan Oksana Chusovitina ham o‘zining so‘nggi Olimpiadasiga jiddiy hozirlik ko‘rish maqsadida o‘z o‘rnini bo‘shatdi va sport gimnastikasi afsonasini Nigora Tursunqulova almashtirdi.
Turizm va sport vazirligi
Qayd etish kerak, Bobousmon Boturov Tokio—2020 Olimpiadasidagi dastlabki jangini bayonotda keltirilgan 24-iyul kuni emas, 27-iyulda o‘tkazadi. Bokschi reytingda yuqori o‘rinda turgani bois o‘z yurishini 1/8 finaldan boshlashi 22-iyul kuni tashlangan qur’adan keyin ma’lum bo‘lgandi.
Oksana Chusovitina esa bayroqdorlar o‘zgargani borasida hech kim unga izoh va tushuntirish bermagani, bu voqeadan keyin ishtiyoqi so‘ngani haqida ma’lum qildi.
MOQ bosh kotibi Oybek Qosimov O‘zbekiston bayroqdorlarini tanlashda har bir sport turi bo‘yicha musobaqalar taqvimi, shuningdek, barcha delegatlar va sportchilarning fikrini inobatga olingani haqida aytgandi.
Tokio—2020 Olimpiadasi ochilish marosimi Toshkent vaqti bilan 16:00 da boshlanadi. Delegatsiyalar paradi esa 16:30 dan start oladi. paradni Olimpiya o‘yinlari vatani hisoblangan Gretsiya mamlakati boshlab beradi. So‘ngra boshqa mamlakatlar yapon alifbosi ketma-ketligi bo‘yicha stadionda ko‘rinish beradi. O‘zbekiston delegatsiyasi tartib bo‘yicha 25-o‘rindan joy olgan.
Izoh (0)