Дунё ва ўзбек спортига оид 23 июль кунининг муҳим хабарлари дайжести билан танишинг.
Ўзбекистон
Япония пойтахти Токиода тўрт йилликнинг энг нуфузли мусобақаси — Олимпия ўйинларининг очилиш маросими бўлиб ўтди. Унда Ўзбекистон делегацияси ҳам иштирок этди.
Маросим коронавирус пандемияси сабаб мухлисларсиз ўтказилди.
Мавзуга доир: Токио—2020 Олимпия ўйинлари очилиш маросими — суратларда
«Пахтакор»нинг икки нафар собиқ футболчиси яна жамоага қайтди. Клуб матбуот хизматига кўра, ярим ҳимоячилар Достон Ҳамдамов ва Одилжон Ҳамробеков «шерлар» билан 2022 йилнинг охиригача мўлжалланган шартнома имзолаган.
Ҳар иккала футболчи ўтган мавсумда БАА чемпионатига йўл олганди. Ҳамробеков «Шабоб Ал-Аҳли»да ижарада ўйнаган бўлса, Ҳамдамов «Ан-Наср»га трансфер қилинганди. «Ан-Наср» эса трансфердан сўнг Достонни мавсум сўнгигача «Ҳатта» клубига ижарага берганди.
Элдор Шомуродов «Рома»га ўтиши мумкин. Il Tempo’нинг хабарига кўра, 26 ёшли ҳужумчи римликларнинг бош директори Тиагу Пинтунинг назарига тушган. «Рома» бу борада «Женоа» билан алоқага чиққан, футболчининг нархи, тахминан, 15 миллион евро бўлиши кутилмоқда.
«Матч ТВ» нашри эса 22 июль, пайшанба куни «Женоа» бош мураббийи Давиде Баллардинининг 26 ёшли ўзбекистонлик футболчини сотишни тақиқлагани, шунингдек, Шомуродовнинг ўзи ҳам бошқа жамоага ўтишни режалаштирмаётгани ҳақида хабар берганди.Жаҳон
«Манчестер Юнайтед» «Боруссия Д» ярим ҳимоячиси Жейдон Санчо трансферини эълон қилди. «Қизиллар» 21 ёшли футболчи билан 2026 йилгача мўлжалланган битим имзолаган. Санчо янги жамоасида 25-рақам остида тўп суради.
«Барселона» ва «Ювентус» 8 август куни «Камп Ноу»да Жоан Гампер Кубоги доирасида ўзаро тўқнаш келади. Учрашувга 19 869 нафар томошабин ташриф буюриши мумкин.
Жоан Гампер Кубоги — «Барселона» томонидан ҳар йили август ойининг иккинчи ярмида ташкил этиладиган ўртоқлик мусобақаси ҳисобланади.
«Реал» ҳужумчиси Карим Бенземада коронавирус аниқланди. Бу ҳақда Мадрид клуби матбуот хизмати хабар берди.
Сон Ҳён Мин «Тоттенҳэм» билан шартномасини узайтирди. Жанубий кореялик футболчи «шпорлар» билан шартномасини 2025 йилнинг 30 июнига қадар узайтирди. Сон Лондон клубида 2015 йилдан бери ҳаракат қилади.
Килиан Мбаппе «ПСЖ» билан янги шартнома имзоламоқчи эмас, дея ёзмоқда Marca. Парижликлар Мбаппени жамоада олиб қолиш мақсадида унга 2026 йилга қадар мўлжалланган шартнома таклиф қилмоқда. Янги шартномага кўра Килиан йилига 32 миллион евро маош олади. Бироқ Мбаппе ҳозирча таклифни қабул қилмаган. У «Реал»га ўтишни хоҳламоқда. Французнинг клуб билан амалдаги шартномаси 2022 йилда якунига етади.
«Ювентус» Криштиану Роналдуни Мауро Икардига алмашиши мумкин. Corriere dello Sport нашрининг ёзишича, агар «ПСЖ» ҳужумчиси Килиан Мбаппе ушбу ёзда «Реал»га ўтса, Роналду «ПСЖ»га ўтиши мумкин. Турин клуби эса Роналдуни ҳужумчи Мауро Икардига алмаштирмоқчи. Шунингдек, Роналдунинг ўзи ҳам жамоасини ўзгартиришга қарши эмаслиги айтилмоқда.
Изоҳ (0)