Qatar poytaxti Dohada Afg‘onistonning yetakchi siyosatchilari delegatsiyasi va “Tolibon” vakillari o‘rtasida ikki kunlik muzokaralar yakunlandi, ammo yakuniy qo‘shma bayonotda sulh bitimi yoki mamlakatda zo‘ravonlik darajasini pasaytirish haqida hech narsa aytilmagan. Bu haqda Afg‘onistonning Tolo News nashriga tayanib, “RBK” xabar berdi.
Xabarga ko‘ra, har ikki tomon ham yuqori darajadagi tinchlik muzokaralarini davom ettirishga kelishib oldi. Shuningdek, fuqarolik infratuzilmasini himoya qilish, tinch aholi o‘limining oldini olish hamda Afg‘onistonga gumanitar yordam ko‘rsatadigan tashkilotlar va mamlakatlar bilan hamkorlik qilish bo‘yicha kelishuvga erishdi.
Ba’zi ommaviy axborot vositalari ikki tomon Qurbon hayiti kuni mahbuslarni almashish bo‘yicha kelishuvga erishgani haqida xabar bergan. Ammo “Tolibon”ning Qatardagi siyosiy idorasi vakili Muhammad Naim buni rad etdi. “Qo‘shma deklaratsiyadan boshqa hech narsa kelishilmadi”, — deb yozgan u Twitter’da.
Avvalroq “Tolibon” Afg‘onistondagi muammolarni muzokaralar yo‘li bilan hal qilish istagini bildirgandi. Afg‘oniston hukumati va “Tolibon” harakati vakillari o‘rtasida bo‘lib o‘tgan muzokaralar yakunida “Tolibon” yetakchilaridan biri Hibatulla Oxunzoda shunday pozitsiyani bildirib o‘tgan.
Afg‘oniston hukumati vakillari va “Tolibon” a’zolari o‘rtasidagi muzokaralar mamlakatdagi vaziyat keskinlashuvi fonida bo‘lib o‘tmoqda. “Tolibon” mamlakatning turli nuqtalaridagi hududlarning katta qismini o‘z nazorati ostiga olgan.
Bu orada AQSh Afg‘oniston armiyasiga uchta Black Hawk vertolyotini yetkazib berdi. Jangovar vertolyotlar yordamida frontlardagi vaziyat yaxshilanishi va joriy muammolar aviatsiya texnikasi yordamida yaxshiroq hal qilinishi ta’kidlangan.
O‘tgan oy Afg‘oniston Mudofaa vazirligi AQSh mamlakat HHKga 45 ta jangovar vertolyot va yettita A29 qiruvchi samolyotni yetkazib berishini e’lon qilgandi.
Afg‘oniston hukumati kuchlari va “Tolibon” o‘rtasidagi to‘qnashuvlar AQSh o‘z qo‘shinlarini Afg‘onistondan olib chiqishni boshlagach kuchaydi.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. So‘nggi ma’lumotlarga ko‘ra, AQSh Afg‘onistondagi harbiy kontingentining 90 foizdan ko‘prog‘ini olib chiqib ketdi.
Avvalroq “Tolibon” barcha chet el qo‘shinlari Afg‘onistonni o‘z muddatida tark etishini talab qilgani haqida xabar berilgandi. AQSh Afg‘onistondan o‘z qo‘shinlarini olib chiqish amaliyoti avgust oxiriga qadar tugashini ma’lum qildi.
Bugunga qadar Germaniya, Italiya va Avstraliya Afg‘onistondan o‘z qo‘shinlarini olib chiqishni yakunladi.
Izoh (0)