Қатар пойтахти Доҳада Афғонистоннинг етакчи сиёсатчилари делегацияси ва «Толибон» вакиллари ўртасида икки кунлик музокаралар якунланди, аммо якуний қўшма баёнотда сулҳ битими ёки мамлакатда зўравонлик даражасини пасайтириш ҳақида ҳеч нарса айтилмаган. Бу ҳақда Афғонистоннинг Tolo News нашрига таяниб, «РБК» хабар берди.
Хабарга кўра, ҳар икки томон ҳам юқори даражадаги тинчлик музокараларини давом эттиришга келишиб олди. Шунингдек, фуқаролик инфратузилмасини ҳимоя қилиш, тинч аҳоли ўлимининг олдини олиш ҳамда Афғонистонга гуманитар ёрдам кўрсатадиган ташкилотлар ва мамлакатлар билан ҳамкорлик қилиш бўйича келишувга эришди.
Баъзи оммавий ахборот воситалари икки томон Қурбон ҳайити куни маҳбусларни алмашиш бўйича келишувга эришгани ҳақида хабар берган. Аммо «Толибон»нинг Қатардаги сиёсий идораси вакили Муҳаммад Наим буни рад этди. «Қўшма декларациядан бошқа ҳеч нарса келишилмади», — деб ёзган у Twitter’да.
Аввалроқ «Толибон» Афғонистондаги муаммоларни музокаралар йўли билан ҳал қилиш истагини билдирганди. Афғонистон ҳукумати ва «Толибон» ҳаракати вакиллари ўртасида бўлиб ўтган музокаралар якунида «Толибон» етакчиларидан бири Ҳибатулла Охунзода шундай позицияни билдириб ўтган.
Афғонистон ҳукумати вакиллари ва «Толибон» аъзолари ўртасидаги музокаралар мамлакатдаги вазият кескинлашуви фонида бўлиб ўтмоқда. «Толибон» мамлакатнинг турли нуқталаридаги ҳудудларнинг катта қисмини ўз назорати остига олган.
Бу орада АҚШ Афғонистон армиясига учта Black Hawk вертолётини етказиб берди. Жанговар вертолётлар ёрдамида фронтлардаги вазият яхшиланиши ва жорий муаммолар авиация техникаси ёрдамида яхшироқ ҳал қилиниши таъкидланган.
Ўтган ой Афғонистон Мудофаа вазирлиги АҚШ мамлакат HHKга 45 та жанговар вертолёт ва еттита А29 қирувчи самолётни етказиб беришини эълон қилганди.
Афғонистон ҳукумати кучлари ва «Толибон» ўртасидаги тўқнашувлар АҚШ ўз қўшинларини Афғонистондан олиб чиқишни бошлагач кучайди.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.
Аввалроқ «Толибон» барча чет эл қўшинлари Афғонистонни ўз муддатида тарк этишини талаб қилгани ҳақида хабар берилганди. АҚШ Афғонистондан ўз қўшинларини олиб чиқиш амалиёти август охирига қадар тугашини маълум қилди.
Бугунга қадар Германия, Италия ва Австралия Афғонистондан ўз қўшинларини олиб чиқишни якунлади.
Изоҳ (0)