Xitoy hukumati mahalliy Sinopharm kompaniyasining faolsizlantirilgan vaksinasini 3—17 yoshli bolalarda favqulodda qo‘llash uchun ma’qulladi, deb yozadi “Kommersant”.
“Beijing Institute of Bilological Products tomonidan ishlab chiqilgan COVID-19’ga qarshi faolsizlantirilgan vaksina 16-iyul kuni 3—17 yoshdagi bolalarda favqulodda qo‘llash uchun ma’qullandi”, — deyiladi farmatsevtika kompaniyasining sho‘ba korxonasi China National Biotec Group xabarida.
Klinik sinovlarning birinchi va ikkinchi bosqichi natijalariga ko‘ra, sinovda ishtirok etgan 3—17 yoshli bolalarda emlanishdan keyin antitanalar hosil bo‘lish darajasi 100 foizni tashkil qilgan, antitanalarning o‘rtacha geometrik titri esa deyarli kattalardagidek bo‘lgan. Dori jiddiy nojo‘ya ta’sirlarni keltirib chiqarmagan. Sinovning ba’zi ishtirokchilarida harorat ko‘tarilgan va ukol joyi og‘rigan.
Buyuk Britaniya hukumati esa bolalar va o‘smirlarni koronavirusga qarshi ommaviy emlashdan voz kechdi. Faqat ma’lum bir guruhlargina vaksina oladi.
The Telegraph gazetasi ma’lumotlariga ko‘ra, Vaksinatsiya va immunizatsiya bo‘yicha birlashgan qo‘mita ehtimoliy xavflar haqida qo‘shimcha ma’lumotlar olinmagunicha, barcha bolalarni emlamay turishga chaqirdi. Buning o‘rniga, COVID-19’ga chalinish xavfi bo‘lgan (xavf guruhidagi kattalar bilan yashaydigan) 12—15 yoshli bolalarni hamda uch oydan keyin 18 yoshga to‘ladigan o‘smirlarni emlash taklif etilmoqda. Ular Pfizer/BioNTech vaksinasi bilan emlanadi, u Britaniya dorilar aylanmasi ustidan nazorat boshqarmasi tomonidan shu maqsadlar uchun tasdiqlangan edi.
Ushbu qaror haqida rasman 19-iyul, dushanba kuni e’lon qilinishi kutilmoqda.
Izoh (0)