Ruminiyada ketma-ket yo‘l-transport hodisalari yuz berdi, jami 55 ta avtomobil o‘zaro to‘qnashdi, deb xabar bermoqda Euronews. 17 kishi, shu jumladan, besh nafar bola jabrlandi.
Ayni paytda ketma-ket YTHlarni keltirib chiqargan holat aniqlashtirilmoqda.
Mahalliy politsiya bergan ma’lumotga ko‘ra, avariya quyuq tuman sharoitida yuz bergan, shu sababli to‘qnashuv paytida yo‘l yaxshi ko‘rinmagan, ko‘rish mumkin bo‘lgan masofa 50 metrdan oshmagan.
YTHlar ketma-ketligi Buxarest—Konstansa trassasida sodir bo‘ldi. Politsiya yo‘lning 3 km qismini to‘sib qo‘ydi.
Avvalroq AQShning Texas shtati shimoli-sharqidagi Fort-Uert shahridan o‘tuvchi trassada sodir bo‘lgan yo‘l-transport hodisasida kamida 130 ta mashina to‘qnashgan, oqibatda olti kishi halok bo‘lib, yana 36 kishi turli darajadagi jarohatlar bilan kasalxonalarga yotqizilgan edi.
Shuningdek, Rossiyaning Boshqirdiston Respublikasi Aurgazinskiy tumanidagi Ufa—Orenburg trassasida bo‘ron sababli 39 ta avtomobil ishtirokida yo‘l-transport hodisasi sodir bo‘lgan edi. Hodisa oqibatida o‘n kishi, shu jumladan, ikki nafar bola — 12 va 16 yoshli qizlar jabrlangan edi.
Izoh (0)