Amazfit kompaniyasi shovqin so‘ndirish va bo‘yinni to‘g‘ri tutish funksiyasiga yangi simsiz naushnigini taqdim etdi, deb xabar beradi Hi-Tech.Mail.ru.
PowerBuds Pro nomini olgan gadjetga akselerometr o‘rnatilgan bo‘lib, uning yordamida naushniklar umurtqa sohasidagi bo‘yin holatini aniqlaydi. Agarda foydalanuvchining bo‘yni uzoq vaqt bir holatda qolib ketsa, qurilma signal berib, uni o‘zgartirish kerakligini eslatadi. Ishlab chiqaruvchining ma’lumotlarga ko‘ra, bu foydalanuvchilarning qomatini yaxshilashga xizmat qiladi.
Amazfit’ning ma’lum qilishicha, naushniklar, shuningdek, sport bilan shug‘ullanish boshlanganini ham aniqlaydi (gap yugurish haqida ketmoqda) va vaqt, tezlik hamda masofani nazorat qiladi. Olingan ma’lumotlar tahlili natijasida naushniklar foydalanuvchi qancha kaloriya sarflaganini “aytadi”. Aniqroq natijani olish uchun smartfonning fitnes-dasturiga o‘rnatilgan puls chastotasi ma’lumotlarini sinxronlashtirish mumkin.
Gadjetning faol shovqin so‘ndirish tizimining (ANC) bir nechta rejimi mavjud. Asosiy rejim matn tergandagi, konditsioner va fondagi gap-so‘zlarga oid shovqinni so‘ndirishga qaratilgan. Ko‘chadagi rejimda naushniklar dvigatellar ovozini ham “bosishga” qodir. Shuningdek, mashg‘ulot rejimi ham mavjud bo‘lib, uning yordamida shamol kabi shovqinlar bloklanadi, biroq mashinalar signalini eshitish mumkin. Adaptiv rejim atrof-muhitdan kelib chiqib shovqinni so‘ndiradi.
PowerBuds Pro bir marta quvvatlanish orqali 9 soat ishlay oladi, quvvatlantirish g‘ilofi yordamida buni 30 soatiga yetkazish mumkin. Gadjet narxi — 150 dollarni tashkil etadi.
Avvalroq Apple faol shovqin so‘ndirish tizimiga ega simsiz Beats Studio Buds naushniklarini taqdim etgani, Sony kompaniyasi esa 24 soat avtonomlikka ega simsiz naushnigini yaratgani to‘g‘risida xabar berilgandi.
Izoh (0)