Internetda mitti frontal kameraga ega Google Pixel 6’ning “jonli” surati paydo bo‘ldi

Xitoylik manbalar Google Pixel 6 smartfonining foydalanuvchi qo‘lida yoqilgan holda turgani tasvirlangan birinchi haqiqiy surati bilan bo‘lishdi, deb yozadi IXBT.

Suratlarga ko‘ra, Google Pixel 6 oldinroq e’lon qilingan kompyuter renderlari kabi dizaynga ega bo‘lgan. Shuningdek, ta’kidlanishicha, smartfon ulkan hoshiyasiz ekrani va mitti frontal kamerasi sabab suratdagidan ancha hayratlanarli ko‘rinish olgan.

Orqa panel dizayni Google Pixel 6’ni boshqa biror smartfon bilan adashtirib yuborish imkonini bermaydi, hatto u himoya g‘ilofida bo‘lsa ham. Orqa panel ikki xil rangda ishlangan, kamerasi esa qora yaltiroq aksentga ega.

Mish-mishlarga ko‘ra, Google Pixel 6’ga 6,4 dyuymli AMOLED ekran, 8 gigabayt tezkor hamda 128/256 gigabayt ichki xotira o‘rnatiladi. Asosiy kamerasi 50 megapikselni tashkil etadi, frontal kamerasi 8 megapikselga ega bo‘ladi. Shuningdek, akkumulyator sig‘imi 4614 mA/soatni tashkil etishi mumkin.

Yangi model taqdimoti 2021-yilning oktabriga mo‘ljallangan.