Amazfit компанияси шовқин сўндириш ва бўйинни тўғри тутиш функциясига янги симсиз наушнигини тақдим этди, деб хабар беради Hi-Tech.Mail.ru.
PowerBuds Pro номини олган гаджетга акселерометр ўрнатилган бўлиб, унинг ёрдамида наушниклар умуртқа соҳасидаги бўйин ҳолатини аниқлайди. Агарда фойдаланувчининг бўйни узоқ вақт бир ҳолатда қолиб кетса, қурилма сигнал бериб, уни ўзгартириш кераклигини эслатади. Ишлаб чиқарувчининг маълумотларга кўра, бу фойдаланувчиларнинг қоматини яхшилашга хизмат қилади.
Amazfit’нинг маълум қилишича, наушниклар, шунингдек, спорт билан шуғулланиш бошланганини ҳам аниқлайди (гап югуриш ҳақида кетмоқда) ва вақт, тезлик ҳамда масофани назорат қилади. Олинган маълумотлар таҳлили натижасида наушниклар фойдаланувчи қанча калория сарфлаганини «айтади». Аниқроқ натижани олиш учун смартфоннинг фитнес-дастурига ўрнатилган пулс частотаси маълумотларини синхронлаштириш мумкин.
Гаджетнинг фаол шовқин сўндириш тизимининг (АNC) бир нечта режими мавжуд. Асосий режим матн тергандаги, кондиционер ва фондаги гап-сўзларга оид шовқинни сўндиришга қаратилган. Кўчадаги режимда наушниклар двигателлар овозини ҳам «босишга» қодир. Шунингдек, машғулот режими ҳам мавжуд бўлиб, унинг ёрдамида шамол каби шовқинлар блокланади, бироқ машиналар сигналини эшитиш мумкин. Адаптив режим атроф-муҳитдан келиб чиқиб шовқинни сўндиради.
PowerBuds Pro бир марта қувватланиш орқали 9 соат ишлай олади, қувватлантириш ғилофи ёрдамида буни 30 соатига етказиш мумкин. Гаджет нархи — 150 долларни ташкил этади.
Аввалроқ Apple фаол шовқин сўндириш тизимига эга симсиз Beats Studio Buds наушникларини тақдим этгани, Sony компанияси эса 24 соат автономликка эга симсиз наушнигини яратгани тўғрисида хабар берилганди.
Изоҳ (0)