Apple kompaniyasi iPhone smartfonlarining orqa paneliga qotiriladigan MagSafe akkumulyatorini taqdim etdi, deb xabar beradi Hi-Tech.Mail.ru.
Yangi MagSafe akkumulyatori iPhone 12, iPhone 12 mini, iPhone 12 Pro va iPhone 12 Pro Max’larda ishlash uchun mo‘ljallangan.
Devays oq rangda bo‘lib, aftidan, silikon qoplamaga ega ko‘rinadi. U 5 vattli simsiz quvvatlanish imkoniyatini taqdim etadi. Shu bilan birga, devays stol ustida turadigan 15 vattli quvvatga ega simsiz quvvatlantirish stansiyasi uchun ham mos keladi.
Apple kompaniyasi ushbu aksessuar iPhone batareyalarining xizmat ko‘rsatish muddatini qanchaga uzaytirishi to‘g‘risida ma’lumot bermagan. 9to5Mac nashri ma’lumotlariga ko‘ra, devays sig‘imi 11,2 Vt/soatni yoki 1460 mA/soatni tashkil etadi, bu iPhone 12 mini’ni to‘liq, qolgan iPhone modellarini qisman to‘ldirish uchun yetarlidir.
Rossiyada hozirda aksessuar narxi 9490 rublni (128 dollar) tashkil etmoqda, biroq buyurtmani hozirda rasmiylashtirish imkoniyati yo‘q — u keyinroq paydo bo‘lishi aytilmoqda.
Avvalroq iPhone 12 uchun mo‘ljallangan MagSafe magnit quvvatlantirgichi Android-smartfonlarga ham mos kelishi ma’lum bo‘lgandi.
Izoh (0)