Qirg‘izistonning Jalolobod viloyati Suzoq tumanida yashovchi erkak ikkinchi xotinga uylanib, birinchi turmushidan bo‘lgan bolalari va birinchi ayoli ishtirokida to‘y o‘tkazdi. Bunga javoban Suzoq tumani Ichki ishlar bo‘limi (IIB) “Ko‘p xotinlilik” moddasi bo‘yicha sudgacha bo‘lgan tergov ishlarini boshladi, deb yozadi Kloop.

Videodan kadr

Iyun oyi boshida ijtimoiy tarmoqlarda “Men kundoshimga emas, singlimga baxt tilayman” nomli video tarqaldi. Videoda suzoqlik ayol eriga ikkinchi xotin olib bergani aks etgan.

Restoranlardan birida suratga olingan video birinchi ayolning eriga baxt tilagan so‘zlari bilan boshlanadi. “Men kundoshimga emas, singlimga baxt tilayman. Hamisha birga xursand bo‘lib yuraylik. Baxtli bo‘ling!” — deydi ayol.

Shuningdek, videoda ikki bolakay — qiz va o‘g‘il “ikkala onamiz bilan baxtli bo‘ling” deya otasini tabriklayotganini ko‘rish mumkin.

Mehmonlardan biri bu ishni faqat mard odamlar qila olishini aytib, erkakning birinchi xotiniga minnatdorchilik bildirgan va ayolning o‘z so‘zida turishiga umid bildirgan.

Tadbir davomida erkak ikkala xotini bilan raqsga tushgan, to‘y qatnashchilari qarsak chalib, ularga pul yopishtirgan.

Jalolobod viloyati Ichki ishlar boshqarmasi matbuot kotibi Sherqul Turganboyevning ta’kidlashicha, ushbu holat 10-iyun kuni “Ko‘pxotinlilik” moddasi bilan ro‘yxatga olingan.

Turganboyevning so‘zlariga ko‘ra, erkak ikkala xotin bilan ham yashaydi, lekin boshqa-boshqa uyda. Matbuot kotibi tergov tadbirlari natijasida tegishli choralar ko‘rilishini va’da qildi.

Qirg‘izistonda ko‘pxotinlilik taqiqlangan. Ilgari Jinoyat kodeksida ko‘pxotinlilik uchun ikki yilgacha ozodlikdan mahrum qilish ko‘zda tutilgan edi. Biroq 2017-yilda kiritilgan o‘zgartirishlarga ko‘ra, ushbu jazo jarima bilan almashtirilgan.