Қирғизистоннинг Жалолобод вилояти Ички ишлар бошқармаси томонидан маҳаллий фуқарони кўпхотинлиликда гумон қилиб қўзғатилган жиноят иши тўхтатилди. Бу ҳақда Kloop хабар берди.
Милиция хабарига кўра, бундай қарор жиноят таркиби йўқлиги туфайли қабул қилинган. Маълум бўлишича, гумонланувчининг турмуш ўртоқлари турли манзилларда яшайди.
Қонунга биноан, «эркакнинг умумий уй хўжалигида икки ёки ундан ортиқ аёл билан бирга яшаши» кўпхотинлилик ёки икки хотинлилик деб тан олинади ҳамда жамоат ёки ахлоқ тузатиш ишлари ёки жарима билан жазоланади.
Ҳуқуқ ҳимоячиси Мухаё Абдраупованинг сўзларига кўра, терговчилар «иккихотинлилик ёки кўпхотинлилик» моддасини нотўғри талқин қилмоқда.
«Милиция эркакларнинг икки ёки ундан ортиқ аёлга уйланиб, лекин улар турли манзилларда яшайдиган ҳолатларни кўриб чиқмайди. Менинг амалиётимда бундай ҳолатлар ҳам мавжуд. Улар далил сифатида ‘умумий уй хўжалигини’ келтирмоқда. Аммо бу нотўғри. Моддада қарама-қаршиликлар мавжуд», — деди у.
Эслатиб ўтамиз, июнь ойи бошида ижтимоий тармоқларда «Мен кундошимга эмас, синглимга бахт тилайман» номли видео тарқалди. Видеода Жалолобод вилояти Сузоқ туманида яшовчи аёл эрига иккинчи хотин олиб бергани акс этган.
Маълум бўлишича, сузоқлик эркак иккинчи хотинга уйланиб, биринчи турмушидан бўлган болалари ва биринчи аёли иштирокида тўй ўтказган. Бунга жавобан Сузоқ тумани Ички ишлар бўлими (ИИБ) «кўпхотинлилик» моддаси бўйича судгача бўлган тергов ишларини бошлаган.
Қирғизистонда кўпхотинлилик тақиқланган. Илгари Жиноят кодексида кўпхотинлилик учун икки йилгача озодликдан маҳрум қилиш кўзда тутилган эди. Бироқ 2017 йилда киритилган ўзгартиришларга кўра, ушбу жазо жарима билан алмаштирилган.
Изоҳ (0)